O arquitecto inglés David Chipperfield presentou este mércores en Sada a nova liña de produtos de Sargadelos que el mesmo deseñou, o conxunto Rede, composto por sete pezas.
Trátase dunha ensaladeira, dous pratos —un grande de 24,5 centímetros e outro máis pequeno de 18—, un bol alto, un bol baixo, un vaso/cunca e un floreiro esférico, cuxa forma supón unha chiscadela ás antigas boias de cristal cubertas de rede. Preséntase en catro cores: o branco puro propio da porcelana, o azul cobalto, un rosa tella e un inusual amarelo mostaza. A súa comercialización será por pezas individuais para que así cada cliente poida compoñer o seu propio conxunto, segundo explica a compañía.
Esta colaboración nace, segundo subliñan desde Sargadelos, do agarimo que o artista londiniense lle profesa a Galicia. A relación xurdiu hai xa máis de trinta anos, cando el e a súa familia decidiron pasar as súas vacacións de verán en Corrubedo, onde estableceron desde entón a súa segunda residencia.
"Encántame o directo de Galicia, todo é o que é, tanto o bo como o malo. Non está empaquetado nin presentado, é moi cru e exposto, e moi directo. Do mesmo xeito que a comida, non hai fantasías nin aspiracións. É un lugar no que a vida foi dura e que moldeou o respecto da xente pola terra e o mar", asegura Chipperfield.
Así mesmo, explicou que escolleu traballar en relevo por unha "serie de referencias", como a idea da rede de pesca, pero tamén "unha alusión á decoración tradicional da cerámica xaponesa".
Trátase dunha colección que emprega a presenza dunha retícula xeométrica exterior como o seu elemento construtivo principal. Inspirada nas redes tradicionais de pesca, esta retícula varía lixeiramente a súa morfoloxía para adaptarse ás distintas superficies volumétricas sobre as que se aplica.