Os datos de Semana Santa mostran un incremento de turistas internacionais na Mariña

Os datos de ocupación durante a Semana Santa arroxan un bo resultado na comarca cunha ocupación media do 93,33%, segundo os datos da Asociación Provincial de Empresarios de Hostalería e Turismo de Lugo (Apehl) que chegou ao 100% o xoves e o venres. Ademais segundo as mesmas fontes, A Mariña, xunto a Ribeira Sacra, consolídase como destino dentro da provincia de Lugo e aumenta o número de turistas internacionais que se achegan á zona. Estas cifras corrobóranas desde os concellos, que tamén fan un balance moi bo destes días.

No caso de Ribadeo a concelleira de turismo, Ana Martínez asegura que se superaron todas as expectativas de visitantes e que se alcanzou "unha dúas marcas históricos neste primeiro período vacacional". Foron preto de 8.000 persoas (7.952) as que pasaron polas oficinas de turismo ribadenses, destacando as 6.099 das Catedrais.

"As oficinas estiveron abertas todos os días para manter a información e a distribución dos visitantes que fundamentalmente se achegan ás Catedrais para que percorran o resto do concello", dixo Martínez. A procedencia destes turistas é, sobre todo de Madrid e do norte peninsular, do mesmo xeito que no resto da comarca, e entre o turismo estranxeiro destacan os chegados de Francia, Alemaña e Arxentina. No que se refire ao turismo estranxeiro, en Ribadeo demandaron información 503 persoas.

Tamén o edil de turismo de Burela, Ramiro Fernández Rey, destacou a presenza de turistas no municipio. "Os datos demostran que Burela se vai consolidando cada día un pouquiño máis cunha oferta turística interesante e a xente así o está a apreciar", afirmou e destacou o éxito das rutas xeolóxicas e o incremento dun 40% nas visitas ao barco museo Reina del Carmen. Fernández Rey tamén puxo en valor os actos relixiosos "que cada vez teñen máis afluencia de xente e teño que felicitar á organización por todo ou traballo que levan feito para ir consolidando e ampliando a oferta da Semana Santa en Burela".

Pola súa banda, o Concello Viveiro calcula que máis de 40.000 persoas visitaron o municipio, onde a ocupación hostaleira "acadou o 100%" e o balance tamén é satisfactorio para hostalería e comercio. Pola oficina de turismo pasaron máis de 5.000 persoas, unha cifra superior á do ano pasado. A alcaldesa, María Loureiro, apunta que a oficina municipal recibiu visitantes de todas as comunidades autónomas e de dez países diferentes, "destacando os turistas vidos dende Francia". O Xoves Santo esta oficina ofreceu gratis ao visitantes pan dos apóstolos e esgotáronse as existencias.

O Concello destaca que non se produciron incidentes destacables tanto na ordenación do tráfico como en seguridade cidadá. Leváronse a cabo controis de documentación de vehículos e condutores "cun total de cero infraccións", controis sobre o horario de peche de locais "sendo a tónica xeral o cumprimento dos mesmos" e control do botellón.

Outro dos municipios máis turísticos da comarca, como é Foz tamén estivo cheo. Neste caso, non só os hoteis albergaron visitantes senón que foron moitos os que se achegaron á súa segunda residencia. "Houbo moitísima xente", destacou o alcalde, Javier Castiñeira, que subliñou que "estas cifras son un bo presaxio para o verán". Neste sentido, puxo en valor o milleiro de persoas que recibiu estes días a basílica de San Martiño, que ofreceu as visitas guiadas.