Os ladróns asaltaron durante a pasada fin de semana a cantina da UD Folgueiro, no Vicedo, para levar boa parte das bebidas que a directiva do club almacenaba. Os causantes do roubo forzaron a porta de acceso á mesma, que o responsable do club, Domingo González, supón que "arrincaron cunha maza". O club estima nuns 500 euros os danos causados e as botellas subtraídas.
Domingo González explica que romperon a porta de madeira, que estaba nova, para acceder ás caixas onde gardaban as botellas, levándose bebidas refrescantes, outras enerxéticas, zumes, auga, cervexa sen alcol ou pipas. Deixaron, no entanto, outras botellas de bebidas que había almacenadas no lugar.
O responsable do club indica que o último día en que pasaron polo campo de fútbol foi o venres, xornada en que houbo adestramentos. González descubriu os danos ao acudir este martes ata o terreo de xogo e aínda non presentaran denuncia, aínda que prevía facelo ante a Garda Civil.
A cantina da UD Folgueiro xa sufriu outro ataque dos cacos hai algo máis de tres anos, aínda que entón non estaba tan pechada como agora. A directiva do club está moi cansada desta situación, que lles ocasiona gastos continuos. No principio do ano denunciaron o roubo dunha parte das varandas de peche do campo, así como das situadas na zona de entrada.
