O Cuarteto Casals, un dos grandes conxuntos de corda a nivel internacional, tocará este mércores 25 de agosto ás 20:30 na Basílica de San Martiño de Foz.
Trátase do penúltimo concerto incluído no ciclo 'Música á beira do mar' do VIII Festival Bal y Gay.
O grupo regresa ao festival tras a súa primeira actuación no mesmo escenario hai dous anos.
Os violinistas Vera Martínez-Mehner e Abel Tomàs, o viola Jonathan Brown e o chelista Arnau Tomàs interpretarán o Cuarteto en re menor de Wolfgang Amadeus Mozart, o Cuarteto nº11 de Dmitri Shostakovich e (Variacións sobre unha) Praza en silencio/Azoteas alegres, de Daahoud Salim. Esta última composición é un estrea mundial en colaboración coa Schubertíada de Vilabertrán.
Desde a agrupación sinalaron que están "moi contentos de volver ao Festival Bal y Gay" na súa oitava edición.
"Será a nosa segunda actuación en Foz e na Basílica de San Martiño. Temos moitas ganas de volver e de gozar deste precioso lugar con todas as persoas que vingan", aseguraron.
Outros concertos do festival
Ademais, este martes ás 20:30 horas na Fábrica de Sargadelos, en Cervo, tocará o guitarrista Pablo Sáinz-Villegas, un dos grandes nomes da escola guitarrística española na actualidade.
Os actos do festival finalizarán o xoves ás 21:00 horas na Catedral de Mondoñedo, cun concerto da Orquestra Sinfónica de Galicia baixo a batuta do seu director titular, o ruso Dima Slobodeniouk.