A circulación quedou cortada en ambos os sentidos na Autovía do Cantábrico (A-8) entre os municipios de Mondoñedo e Abadín, como consecuencia dos densos bancos de néboa que dificultan a visibilidade e condicionan a seguridade dos propios usuarios.
O nivel de servizo vermello quedou establecido no Alto do Fiouco, entre os quilómetros 536 e 552, ás 05.21 horas deste venres -día 28 de maio-, como consecuencia da “visibilidade reducida” nese tramo de autovía, o que rebaixou a velocidade máxima na vía ata os 60 quilómetros por hora.
Con todo, as condicións empeoraron ao longo da mañá, polo que o nivel de servizo negro, que obriga a interromper a circulación, quedou establecido ás 11.34 horas.
Aos condutores que transitan por ese tramo avísaselles da limitación mediante os correspondentes paneis luminosos.
Os problemas coa néboa nese punto da Autovía do Cantábrico son recorrentes e, de feito, está en marcha un proxecto de Ministerio de Transportes, Mobilidade e Axenda Urbana para a instalación de prototipos sobre o terreo que permitan avanzar en solucións alternativas para superar esta situación.
