O Corpus terá tapices en Viveiro

A Irmandade de Mulleres da Santa Cruz de Viveiro retoma este ano a elaboración dos tapices florais para a procesión do Corpus deste domingo, cuns preparativos nos que as confrades traballan nun local da antiga casa dos mestres desde hai tres semanas. Na noite do sábado plasmarán os debuxos na Praza Maior e no exterior das igrexas de Santa María e San Francisco, para o que piden colaboración veciñal. 

As mans para preparar a tuia son cada vez menos pero niso afanáronse nos últimos días unha ducia de mulleres. "A xente cada vez vai a menos, algunha vai faltando, outra non pode porque normalmente é xente xa de mediana idade que xa ten problemas de artrose ou artrite; non hai xuventude e iso nótase", recoñece a irmá maior, María del Carmen López, Chipe, que espera que se some máis xente para a confección na rúa dos deseños, que empezarán cara ás dez da noite. "Necesitamos man de obra de xuventude para estar na rúa e ir facendo os tapices", comenta. 

O grupo pretende "asegurar" o tapiz grande da Praza Maior, facer tamén algo na igrexa de Santa María e intentalo así mesmo en San Francisco, "pero vai depender moito da xente que acuda a axudar e a traballar". 

As mulleres que se reunían estes días na casa dos mestres empezaron recollendo a tuia, levándoa ao local —algunha facilitoulla persoal do Concello tras realizar podas en espazos públicos— e desmenuzándoa para organizala en caixas. "Xa levamos cento e pico", reseña Chipe. Ao mesmo tempo foron tinguindo o sal e para o final quedou a recolección das flores que empregan. "O sal e a flor hai que comprala e de feito agradecemos ao Concello que tamén nos axuda neste labor. Outra parte págaa a irmandade da Santa"Cruz , apunta. 

"Necesitamos man de obra de xuventude para estar na rúa e ir facendo os tapices", comenta

Para elixir as flores buscan variedades que teñan consistencia para que aguanten mellor nas alfombras. "Utilizamos flor que asente un pouco, por exemplo o caravel ten unha base difícil de asentar e temos o problema de que se hai vento lévao todo, entón traballamos moito a margarida tupida en distintas cores e o que facemos tamén é ir en coche a moitos sitios, a Galdo, Landrove, Chavín ou Celeiro, a coller directamente hortensias que tamén nos dan un bo resultado porque renden moito e non nos custan cartos", expón. 

Os motivos dos deseños cambian cada ano e tras realizar o debuxo realizan os persoais en función do espazo que van ocupar. "Só hai unha cousa que respectamos sempre, o caliz e a custodia no centro da praza porque é o día do Corpus. O resto dos debuxos ímolos variando ou son alusivos ao que se celebra cada ano. Nesta ocasión estamos moi sensibilizados con Ucraína e vai haber algún debuxo alusivo á paz", avanza. 

Desde a irmandade esperan que non se produzan actos vandálicos para que os tapices luzan na procesión deste mediodía.