A repetición das eleccións municipais na mesa 01-005 O, situada no IES Perdouro de Burela, non moveu a conformación da corporación. Así, o PSOE segue conservando os seus seis edís, o PP ten catro e o BNG mantén os tres. Era precisamente o terceiro edil da formación nacionalista o que estaba en liza con Burela Sempre, con todo as novas votacións mantivérono no Bloque e tamén por un voto, do mesmo xeito que nos anteriores comicios.
Nas votacións deste domingo, o BNG fíxose con 63 votos e Burela Sempre con 30, polo que o total de votos conseguidos por ambas as formacións suma 810 e 270. Os nacionalistas necesitaban así 270 no resto para conservar o terceiro concelleiro, que foron xusto os conseguidos pola formación independente. A lei electoral ditamina que en caso de empate prevalece a formación con máis número de votos. Neste caso o BNG. Pero os novos resultados tamén puxeron en apretos ao PP, posto que en función destes e a participación deste domingo, o seu cuarto concelleiro situábase nos 272 votos no último resto, unha cifra non moi afastada dos apoios de Burela Sempre. Aínda que nalgún momento os socialistas tamén barallaron poder conseguir a maioría absoluta sumando outro concelleiro, finalmente os votos deste domingo non foron suficientes.
Alfredo Llano (PSOE): "O Psoe segue sendo a forza política máis votada, polo que para nós estes son uns bos resultados"
A participación foi máis baixa que en maio e non chegou ao 50% do censo nunha xornada marcada pola normalidade, na que os electores foron achegándose aos poucos á mesa ao longo de todo día. Dos 630 electores que estaban chamados ás urnas, votaron 301, o que supón 102 menos que no mes de maio. A repartición de votos este domingo foi de 116 para o PSOE, 86 para o PP, 63 para o BNG, 30 para Burela Sempre, dous para Cs, un para Vox e tres papeletas que foron declaradas nulas.
Desta forma, no cómputo global os socialistas foron a forza máis votada no municipio con 1.837 votos, en segundo lugar situáronse os populares con 1.089 e en terceiro lugar o BNG con 810 votos. Desta forma, son os tres partidos que conseguiron representación na corporación.
Mario Pillado (BNG): "Estamos satisfeitos e con tres concelleiros na corporación agora o que toca é traballar pola veciñanza"
VALORACIÓNS. As reaccións dos partidos tras o escrutinio, e á espera da revisión dos votos que se producirá o mércores na xunta electoral de Mondoñedo, foron de satisfacción nuns casos e de certo desgusto noutros.
O portavoz do BNG, Mario Pillado, non ocultaba a súa satisfacción por conservar o terceiro concelleiro e avanzaba que a partir de agora o que toca é "traballar pola veciñanza". En Burela Sempre, as caras eran máis longas ao volver quedar ao bordo de entrar na corporación, con todo, a cabeza de lista, Carlos Peinó, aseguraba: "Para ser a primeira vez que nos presentabamos a unhas eleccións non está mal o resultado conseguido" e subliñaba: "Non somos derrotistas, polo que Burela Sempre vai seguir aí".
Mario Rouco (PP): "A abstención sempre nos prexudica, pero estamos contentos de contar con catro concelleiros"
Nas filas socialistas tamén había satisfacción por seguir sendo a forza política máis votada e conseguir a vitoria na mesa de onte con 116 votos. "Para nós é un bo resultado", aseguraba o alcalde en funcións, Alfredo Llano.
Pola súa banda, o candidato do PP, Manuel Rouco, destacou a elevada abstención, "que en Burela sempre nos prexudica", pero valorou positivamente conservar os catro concelleiros que lles outorgaron as urnas en maio. "Sabiamos que chegar a un quinto concelleiro era moi dificil, polo que para nós é un éxito contar con catro representantes na corporación", afirmou.
NEGOCIACIÓNS. Cos mesmos resultados que en maio, a incógnita sobre como se conformará o equipo de goberno volve estar sobre a mesa.
Carlos Peinó (Burela Sempre): "Para ser a primeira vez que nos presentabamos non está mal o resultado e imos seguir aí"
Tras as eleccións do 26-M, socialistas e nacionalistas xa mantiveron contactos neste sentido, pero nunca chegou a concretarse ningún avance debido ao mandato do Tribunal Superior de Xustiza de Galicia (TSXG) de volver repetir as eleccións na mesa do Perdouro debido ao recurso presentado por Burela Sempre por mor da desaparición dos seis votos que fosen declarados nulos.
Naquel momento, Alfredo Llano defendía a idea dos socialistas de gobernar en solitario con apoios puntuais. Entre outras cousas, consideraba que un equipo de goberno con nove concelleiros era demasiado para unha localidade como Burela. Este domingo, a postura non era tan clara e xa avanzaba conversacións co BNG ao longo desta semana. Desde o Bloque, Pillado mantense aberto á negociación e deixa no aire todo o que poida pasar a partir deste momento.
Segundo avanzou Llano a semana pasada, o pleno de investidura podería ser o próximo 7 de decembro, aínda que segundo os prazos pode atrasarse ata o 14. E despois ten que celebrarse a sesión de organización.
