O Burela Pescados Rubén ultima o primeiro convenio do fútbol sala feminino, que, entre outros aspectos, asegura a renovación automática dos contratos das xogadoras que queden embarazadas. A noticia alcanzou unha gran transcendencia e estes días tanto medios deportivos como xeneralistas de toda España se fixeron eco dela.
O presidente do conxunto lucense, Manuel Blanco, explicou en declaracións a Efe que o club "leva tempo" fomentando a "igualdade" no deporte e agora deu "un pasiño máis cun convenio colectivo que non tiña ningún club".
O obxectivo do club que milita na máxima categoría do fútbol sala feminino e cuxo equipo masculino compite en Segunda División é dar "tranquilidade" ás xogadoras para que se centren no deportivo". "Aquí todas teñen o seu contrato profesional, exceptuando as que soben das categorías inferiores, que teñen que gañalo", recorda o dirixente do club.
Blanco asegura que tanto os xogadores do equipo masculino como as do feminino cotizan á seguridade social e viaxan no mesmo autobús.
Detrás do equipo está a empresa que lle patrocina, Pescados Rubén, que leva anos apostando polo fútbol sala na localidade costeira do norte de Lugo, que ten menos de 10.000 habitantes.
"Ata hai nada, ninguén apostaba polo deporte feminino e eles lévano facendo desde hai moito tempo. Se podes relacionarte na elite do fútbol sala é porque tes alguén detrás que garante o proxecto", advirte.
Hai xogadoras que cobran máis que algúns xogadores do equipo masculino, salarios que non teñen en conta o sexo, senón a "calidade deportiva", en palabras do presidente.
O convenio, unha iniciativa pioneira no fútbol sala español, está a piques de facerse realidade. "Estamos a fiar pequenos detalles que nos quedan coa asociación de xogadoras e esperemos que estea listo canto antes. Quedan con pequenos flocos. Na miña opinión, este convenio é mellor que o masculino", asevera Blanco.
O Burela Pescados Rubén foi campión de Liga en dúas oportunidades (2012/13 e 2015/16), da Copa do Rei en 2013 e da Supercopa de España en 2015, palmarés que intentará ampliar no novo curso.
"Fixemos un equipo compacto, con xogadoras de moi alto nivel para intentar loitar polos títulos", advirte o seu presidente a menos de dúas semanas para que comece o campionato.
