Dous das catro persoas ingresadas na madrugada deste mércores no Hospital da Mariña como consecuencia do incendio rexistrado nunha vivenda de San Cosme de Barreiros foros hospitalizadas. Trátase do matrimonio residente na casa onde se orixinou o lume: o home, J.P.V, de 73 anos, quedou en observación mentres a súa esposa, E.R.F, de 72, está na Uci á espera de ver como evoluciona nas próximas horas e é que a muller foi a peor parada tras o sinistro, xa que foi rescatada inconsciente polos bombeiros, que tiveron que practicarlle a reanimación antes de ser atentida polos servizos sanitarios que se desprazaron ata o lugar.
"Parece ser que ela intentou volver á casa coller algo e xa non puido saír", conta o fillo da parella, Ramón Piñeiroa, que o pasado mércores puido acceder á vivenda a retirar algunhas pertenzas e que, moi afectado, relata o que lle contou o seu pai sobre o accidente: "Di que oíu como estoupar os azulexos e grazas a iso deuse conta de que algo estaba a pasar e, menos mal, porque senón podería ter ocorrido unha desgraza moito máis grande", asevera, recordando que o incendio tivo lugar sobre as tres e media da madrugada con todos os veciños do bloque durmindo.
O home intentou sacar á súa esposa, que quedou inconsciente no chan, como confirmaron tamén os bombeiros, que para poder acceder tiveron que illar o incendio e facer unha vía de acceso para rescatar á muller, que tras practicarlle as manobras de reanimación deu sinais de vida, polo que foi atendida polo persoal do 061, que desprazou á zona catro ambulancias, a avanzada e tres asistenciais, a cuxo persoal se sumaron tamén sanitarios da PAC de Ribadeo.
En total, foron cinco as persoas atendidas na zona, das que un home de 51 anos non necesitou ser trasladado ao hospital burelense, ata o que si foron evacuados, ademais do matrimonio, un mozo de 19 anos, D.B.R. e outro home de 50, con iniciais J.A.I. que foron dados de alta na mañá do mércores.
Os cinco residían no número 5 da Rúa da Vila de Barreiros, un bloque das antigas vivendas sociais de San Cosme, situadas xunto á gardería. Un inmoble de catro plantas, con dous pisos en cada unha, na que na noite de onte foron evacuadas trece persoas, que tiveron que saír co posto ante o perigo que supuña a densa fumareda que se produciu e que afectou ás partes comúns do inmoble, por onde o fume se propagou con gran rapidez, e que provocou dificultades para respirar.
Foron momentos de gran tensión e nerviosismo, segundo confirmou a alcaldesa, Ana Ermida, que se desprazou ata o lugar dos feitos. A rexedora encomiou a actitude de bombeiros, persoal sanitario e Garda Civil tanto nos labores de rescate, como no acompañamento aos afectados.Unhas persoas que están á espera de que poidan volver ás súas vivendas, para o que todo debe estar ben ventilado e coa seguridade de que o edificio non sofre danos estruturais, como parece en aparencia, aínda que deben determinalos os expertos.
CALCINADA. A Garda Civil, que tamén se desprazou ata a zona, investigará as causas do sinistro, sobre cuxo orixe se baralla un posible curtocircuíto na neveira. A cociña, que quedou completamente calcinada, foi a estancia máis afectada, aínda que tamén o está o resto da vivenda sinistrada, aseverou Ramón Piñeiroa, aínda co susto no corpo. "Cando me chamaron ás catro dá mañá xa sabía que era por algo malo e case nin recoñecín a voz de meu pai ao que lle prestasen un móbil para chamar", conta este home, veciño de Becerreá, quen confía en que todo vaia ben. "Nunca esperas que che vaia tocar a ti", laméntase.
O balbordo espertou a boa parte da veciñanza, formado por varios bloques. "Ouvimos moito balbordo e cando nos asomamos xa vimos a ambulancia, a Garda Civil, vos bombeiros... O susto foi grande e pensamos que fora unha explosión de gas", conta Aurora Moreira, do edificio contiguo. A pesar da mobilización houbo veciños que non se decataron. "Eu de nada", aseveraba un señor maior que vive no mesmo edificio de Aurora. "E eu pola mañá, pola prensa, por vosoutros ademais", comentaba outro.
A cociña da vivenda sinistrada é unha das primeiras estancias da casa, situada á esquerda da porta de entrada, polo que os moradores tiveron que pasar pegados a ela para poder abandonar a vivenda, que ao ser un primeiro piso ten as fiestras protexidas con reixas, o que non foi un impedimento para a súa evacuación.
