O condutor dun turismo foi evacuado ao hospital por unha ambulancia do 061 logo de autolesionarse na zona de Lodeiro, en Viveiro. Fíxose cortes nas bonecas tras chocar con outro turismo.
Aínda que os ocupantes dos vehículos implicados no sinistro viario non sufriron lesións de relevancia debido ao accidente, o condutor sufriu unha crise emocional e fíxose dano a si mesmo, polo que tivo que ser trasladado a un centro hospitalario. No incidente interviñeron axentes de Policía Nacional e Local.
Doutra banda, unha colisión de tres vehículos saldouse este venres sen feridos. Ocorreu ás sete e media da tarde en Cordido, na estrada LU-162 que conecta Cangas con Ferreira. Interviñeron a Garda Civil de Tráfico e Protección Civil de Foz.
Ademais, os bombeiros de Barreiros e Protección Civil de Foz realizaron ás tres da tarde a apertura da porta dunha vivenda no Paseo de Colón ao alertar unha veciña de que a súa tía, unha muller maior, non abría. Tamén acudiu unha patrulla da Garda Civil de Burela. Felizmente atopábase ben e na cama.
