O xulgado do Penal número 1 de Lugo impuxo este martes sendas penas de dous anos de cárcere a un home e a unha muller acusados de prostituír a unha menor na zona de Viveiro. Ambos recoñeceron os feitos e chegaron a un acordo coa Fiscalía, que solicitaba inicialmente catro anos de prisión para cada un.
Ademais de asumir a súa culpa, os acusados comprometéronse a indemnizar á nena e a non volver delinquir en tres anos, polo que -se cumpren ambas as condicións- non terán que ingresar en prisión a pesar da gravidade dos feitos.
Segundo o relato do ministerio público, a muller, con iniciais R.O.M., "animou e logrou convencer" a unha nena de 14 anos para que "prestase servizos de contido sexual a terceiros a cambio de diñeiro". A acusada fixo ademais un trato coa menor para repartir a partes iguais o diñeiro que lle pagasen os clientes que ela lle facilitase.
Deste xeito, o 20 de agosto de 2014, acompañou á vítima ata o domicilio do acusado "para que lle proporcionase pracer sexual a cambio dunha cantidade económica".
Unha vez na vivenda, o home, con iniciais F.G.Q., mantivo relacións sexuais coa moza, "sendo sabedor de que se deitaba cunha menor de idade", e pagoulle 50 euros polos servizos prestados. A nena saíu da vivenda e entregoulle a metade á acusada, tal e como acordaran previamente.
O ministerio público explicou ademais que este episodio non foi un caso illado. De feito, "non pondo fin ao seu reprochable comportamento", a acusada volveu acompañar á nena ao día seguinte ao mesmo domicilio para que se deitase de novo co home, unha vez máis a cambio de 50 euros, dos que a moza quedou unicamente 25.
A muller, tal e como apuntou o ministerio fiscal, coñecía perfectamente a idade da menor e actuou "polos máis deostados propósitos de obter beneficios económicos co negocio carnal de terceiros".
Ao home, que tamén sabía a idade que tiña a nena, achácalle que non lle importou "de ningún xeito o adecuado desenvolvemento, a formación da personalidade, a capacidade de autodeterminación e o pleno exercicio da liberdade sexual" da vítima.
VIXILANCIA. Os dous acusados asumiron este martes a súa culpabilidade e pactaron a súa condena como autores dun delito de prostitución de menores do artigo 187.1 do Código Penal.
O acordo, que lles permitirá de entrada eludir o ingreso no cárcere, tamén serviu para que a vítima non tivese que declarar e recordar o seu calvario ante a xuíza do Penal 1 e dos demais asistentes á vista oral.
Ademais dos dous anos de cárcere, R.O.M. e F.G.Q. aceptaron igualmente unha condena de cinco anos de liberdade vixiada, que comezará a contar cando finalice o período da pena privativa de liberdade.
