Roberto Roque Pereira, ao que todos coñecen como Róber, será a primeira persoa de España con síndrome de Down en participar nun certame profesional de baristas e farao o venres en Foz, onde terá que competir, en igualdade de condicións, con outros doce elaboradores de café, entre eles o seu formador, Marcos González, actual campión nacional e gañador o pasado ano do certame focense.
Unha cita na que nesta edición tamén participará Víctor Couto, natural de Foz e primeiro profesor de Róber no centro de Down Vigo, ao que pertence.
Varios meses levan adestrando xuntos Marcos e Rober, aínda que o máis tranquilo é este último, que ten moitas ganas de dar o mellor de si en Foz. "A min o que máis me gusta é facer café", recordaba este martes por teléfono.
Na súa actuación no instituto mariñán deberá preparar catro expresos, catro capuchinos e outros tantos cócteles sen alcol, todo iso en menos de quince minutos, un reto para o que sente preparado. A súa seguinte cita será o 16 de maio no Campionato Nacional de Baristas, en Vigo.
