O Concello de Viveiro acordou suspender temporalmente as clases presenciais no conservatorio de música ao detectarse cinco casos de covid-19 entre alumnos. A medida adoptouse de común acordo coa dirección do centro municipal, no que estudan alumnos de diferentes concellos da comarca.
As clases seguirán online. O período de suspensión presencial comprenderá inicialmente ata o 5 de febreiro e despois analizarán a necesidade ou non de prorrogalo, segundo evolucione a situación epidemiolóxica.
O obxectivo é garantir a seguridade de usuarios e traballadores velando pola saúde pública, segundo a alcaldesa, María Loureiro.
