A alcaldesa de Viveiro, María Loureiro García, considera que as retencións puntuais, como a ocorrida o domingo pasado coa saída dos seguidores do Resurrection, non xustifican a implantación de desvíos do tráfico. "Nos momentos de maior afluencia nunca nos expomos posibles desvíos da circulación", recalca.
Loureiro, que está convencida de que a circulación desconxestionarase moito coa reapertura do peirao antigo, apunta que "a proba de lume pasámola o domingo pasado coa marcha dos seguidores do Resu e liquidouse coa presenza dos policías". A alcaldesa admite que se produciu tráfico lento nese momento, "pero non houbo caravanas". Internautas referiron traxectos de hora e media desde Covas e Celeiro.
Respecto ao uso de vías alternativas para a saída de Viveiro cara a Celeiro pola estrada de Santo Albites, Loureiro asegura que os veciños xa coñecen esa opción.
A alcaldesa entende que pouco máis se pode facer" que a remodelación xa realizada polo seu goberno e reitera que en momentos de colapso refórzase a presenza policial para dar fluidez. María Loureiro incide en que "o único que pode solucionar o tráfico é a creación dunha vía paralela -en alusión á ansiada estrada de circunvalación-, que é o que levamos demandando anos".