O alcalde de Burela, Alfredo Llano, confirma que nos plans do equipo de goberno figura reducir a velocidade dos vehículos a 30 quilómetros hora na céntrica rúa Eijo Garay da localidade. Aínda non está fixada a data na que esta medida podería entrar en vigor, pero farase seguindo a pauta xa iniciada o pasado mes de febreiro cando se prohibiu circular a máis velocidade noutras rúas. Xa naquel momento, Llano non descartaba que esta medida se aplicase noutras zonas "para aumentar a seguridade do tráfico e para beneficiar ao conxunto da veciñanza". Agora, pasados xa uns meses desde a súa entrada en vigor e vendo que os resultados son positivos, o Concello seguirá avanzando en reducir a velocidade no centro urbano para aumentar a seguridade.
Desde principios de ano esta limitación é efectiva nas inmediacións dos centros de ensino, na Avenida da Mariña, na rúa Castelao e na contorna do Cantiño. Ademais desde hai uns días, mellorouse a sinalización viaria na zona portuaria, concretamente no viario de acceso á lonxa e tamén se pintaron sinais que limitan a zona a 30 quilómetros por hora. Ademais, nesta zona do porto hai instaladas bandas de redución da velocidade e na Avenida da Mariña pasos de peóns elevados para evitar que os vehículos sobrepasen o límite establecido.
Con respecto á Avenida da Mariña, Llano puntualizaba cando se adoptou a medida, que se tomou a decisión por mor das queixas veciñais pola velocidade excesiva á que circulaban os vehículos nunha zona con abundante poboación, negocios, locais de hostalería e de acceso á praia urbana e ao paseo marítimo. Tamén na zona portuaria colocáronse as bandas hai tempo e agora renóvase a sinalización horizontal coa redución de velocidade para evitar que os vehículos poidan circular a unha velocidade excesiva nunha zona onde hai moito tránsito de camións e de persoas.
APOSTA. Esta medida de reducir a velocidade en certas zonas enmárcase na aposta do equipo de goberno por humanizar a localidade. A idea coa que traballan é que o peón vaia gañando espazos e que a presenza dos vehículos se vaia reducindo.
Neste sentido, hai uns días que Llano defendía a semipeonalización como a mellor fórmula para avanzar na humanización do pobo. De feito, un dos anuncios que fixo este equipo de goberno foi o de levar a cabo unha peonalización precisamente da rúa Eijo Garay, unha decisión que levantou moitas críticas no seu momento.
