O goberno municipal de Barreiros pechou este mércores coa alcaldesa de Lugo, Lara Méndez, un convenio mediante o cal o parque de bombeiros de Lugo cede ao Concello mariñán un camión motobomba por un período inicial de catro anos.
Ana Ermida, mandataria barreirense, recordou que o camión motobomba do que dispuña sufriu unha avaría o pasado verán. Era un vehículo con máis de trinta anos "e reparalo supoñía un investimento demasiado elevado para un vehículo desas características que ademais non garantía a súa plena operatividade, de xeito que ou goberno municipal realizou todas as xestións posibles para garantir a dispoñibilidade dun vehículo deste tipo non municipio".
Tras saber que Lugo dispuña dun vehículo en desuso coas características necesarias para facer a cobertura deses servizos en Barreiros, Ermida e a edil Carmen Veiga solicitaron a cesión á alcaldesa lucense.
O convenio asinárono as dúas alcaldesas, Ana Ermida e Lara Méndez, con presenza da primeira tenente de alcalde de Barreiros, Carmen Veiga, e o concelleiro de medio rural, Dámaso Ratoeira.
Ermida agradeceu ao goberno municipal de Lugo, e particularmente á súa alcaldesa, "a boa disposición amosada e as facilidades para axilizar a tramitación administrativa que permite a posta a disposición do vehículo para Barreiros xa neste momento".
Con esta cesión gratuíta, Barreiros contará, unha vez realizada a posta a punto e regularizada a situación administrativa, con motobomba dispoñible para a prestación de servizos municipais contra incendios, limpezas de espazos públicos ou problemas de atascos na rede de sumidoiros municipal así como distintas tarefas en camiños.
A rexedora barreirense engadiu que "en calquera caso, mentras ou Concello non dispuxo de motobomba, lestes servizos seguiron a realizarse, ben mediante a colaboración con medios de concellos veciños ou mediante a contratación dúas mesmos, polo que Barreiros non perdeu en ningún momento ningún deses servizos", aclaración que realizou por mor das críticas vertidas polo portavoz da oposición, o concelleiro do PP Afonso Fonte.