O Concello de Viveiro adquiriu dúas parcelas lindeiras co cemiterio municipal de Altamira para facilitar o acceso ao mesmo para o arranxo do muro, cuxo deterioración se agravou tras as riadas de novembro ao acrecentarse as gretas na estrutura, que xa tiña un derrube noutra zona do perímetro.
A corporación aprobará no pleno extraordinario deste xoves a rectificación do inventario municipal para a inclusión destes dous terreos. "O Concello comprou as dúas parcelas porque era difícil acceder cara ao muro para o seu arranxo, para poder facer mellor o peche novo", apunta a alcaldesa, María Loureiro, que nunha primeira estimación cifrara o custo da reconstrución da estrutura nuns 40.000 euros "pero probablemente sexa máis", recoñece.
O Goberno provincial asumirá todo o vinculante con este arranxo, incluído o seu financiamento. "O tema é que hai que facer un estudo de enxeñería externo que vai facer a Deputación porque está nun sitio complicado, non se pode acceder con máquinas de calquera xeito", di María Loureiro, que espera que ao ser unha obra de urxencia esta se poida levar a cabo o máis axiña posible.
"O muro cae pero está apontoado", comenta a alcaldesa sobre a situación actual do peche nunha esquina que presenta gretas e na que xa se colocaron unhas pezas metálicas de reforzo para suxeitar a estrutura, sobre a que repousan liñas de nichos.
Na outra esquina superior esborrallouse un tramo que continúa aberto e que haberá que reconstruír por completo.
