A bancada do campo de fútbol de A Marosa, en Burela, atópase en peor estado do que se esperaba e as actuacións a levar a cabo con ela van ter que ser radicais. Isto é, derrubala e construír unha nova.
Isto significa unha obra importante que afectará á utilización do campo de fútbol, que quedará non poderá usarse mentres duren os traballos. Esta conclusión sobre o estado en que se atopa dita bancada é a que reflicte o informe dunha empresa especializada que encargou o goberno municipal de Burela para coñecer o alcance do problema que tiñan entre mans.
O alcalde burelense, o socialista Alfredo Llano, explicouno este sábado con total claridade: "Están moi mal non só as columnas ou as vigas, como xa sabíase. Realmente é un problema estrutural e visual de primeira orde que haberá que resolver por medio dunha obra de substitución. Non chegará cun reforzo ou unha reconstrución parcial do que hai".
Llano di que a recomendación do informe técnico que recibiron é moi clara: "Tombar a bancada que hai e facer unha nova", e ante uns datos tan evidentes, apuntou que o goberno municipal asúmeos tal cal e é no que se porán a traballar a partir da próxima semana, en tramitar unha nova bancada para A Marosa.
Para empezar, ao longo da semana que arrinca mañá os responsables do goberno municipal socialista vanse a reunir con responsables da SD Burela para explicarlles o que sucede e estes proxectos de futuro pero, ademais, para abordar diferentes actuacións de índole práctico a aplicar de modo inmediato mentres non se executan esas obras máis ambiciosas.
Todo o que hai nesa zona, como o bar, terá que ser recolocado noutras zonas do campo de fútbol de modo inmediato
Por exemplo, o alcalde xa avanzou que "falaremos con eles para que nos partidos non se meta a xente alí, porque podería haber algún problema e non queremos que haxa ningún tipo de perigo para ninguén. A seguridade ten que ser unha cuestión prioritaria e creo que todos imos estar de acordo niso".
Tamén será necesario "reorganizar os servizos, está alí o bar que haberá que recolocalo e, en xeral, todo o que teñen alí". Para iso é para o que falarán cos membros do equipo de fútbol de Burela. "Despois tocaranos a nós: facer un proxecto e buscar financiamento para unha nova bancada que, mentras se faga, condicionará o fútbol en Burela", concluíu o rexedor.
