Ninguén está preparado para vivir unha situación así. Os membros da familia apenas podían manterse en pé este mércores pola dor de perder un ser querido á temperá idade de trece anos. O único consolo que queda é terse sentido arroupados polos amigos de Íker que, a pesar da súa curta idade, deron a todos unha lección de valentía e enteireza. Deles saíu a idea de facer chapas e adhesivos cun corazón azul, a cor favorita do neno e que este mércores lucían os escolares e docentes do IES Monte Castelo durante o enterro.
Unhas chapas que confeccionaron coa axuda dos alumnos do Bacharelato de Artes e que os nenos repartiron polo centro, coidándose moito de gardar para os achegados de Íker; unhas chapas ás que sumaron tamén adhesivos para que todo o centro puidese sumarse nun mesmo abrazo á familia.
Os escolares de segundo de Eso, o curso do neno, ocuparon un lugar especial na igrexa e un dos seus compañeiros leu o mesmo poema que encabezaba o mural que confeccionaron na súa honra no centro, tamén co azul como protagonista, e onde colgaron as súas mensaxes de despedida. Unha forma de expresarse recomendada tamén polos psicólogos do 112 que se desprazaron ao instituto para axudarlles a soportar a traxedia.
Os profesores tratan agora de que os nenos aprendan a convivir con algo excepcional como a morte dun compañeiro. Uns docentes que non deixaron de arroupar á familia nun momento tan difícil, sen perder de vista os nenos, sabedores de que non todos reaccionan igual e que necesitan tempo para asimilar algo tan inusual.
Os docentes tamén recibiron o apoio dos psicólogos, pois tamén están moi afectados pola traxedia, aínda que todo foron encomios pola súa extraordinaria resposta á primeira asistencia prestada ao neno no mesmo patio do centro, antes de ser evacuado ao hospital, onde faleceu.
