O comité da residencia Geriatros-DomusVi de Viveiro presentou unha denuncia ante a Inspección de Traballo polos "múltiples incumprimentos laborais" da empresa, porque a pesar da situación de urxencia provocada pola pandemia, "non reforzou os cadros de persoal" no centro.
O comité explica nun comunicado que "a pesar da pésima xestión que a empresa está a facer da urxencia sanitaria, e que a Xunta xa tivo que intervir varios dos centros que xestiona, a compañía non reforzaron os cadros de persoal, senón que mantén uns calendarios laborais insufribles".
Segundo a representación do persoal, "obriga ao persoal a asumir tarefas para as que non está formado e prolonga as xornadas de xeito abusivo", o que provoca unha "sobrecarga de traballo inasumible".
Desde o comité avisan de que hai "un déficit estrutural de persoal en todas as categorías, o que provoca unha sobrecarga de traballo que se viu agravada pola pandemia de covid-19".
Denuncia que cando unha enfermeira falta, "as demais teñen que facer quendas de doce horas", así como que as gericultoras "son obrigadas a preparar e a administrar a medicación" aos internos, "sen supervisión de enfermería".
Ademais, en canto ao persoal de limpeza, a pesar de que o seu traballo resulta nestes momentos "básico" para previr o covid-19, "a realidade é que polas tardes só hai dúas persoas", que ademais teñen que facer tarefas de lavandería e servir comedores en dúas quendas".
