O comité de empresa de Alcoa San Cibrao tomou a decisión de limitar a só cinco persoas a presenza no campamento montado na entrada principal do complexo industrial, dentro da folga indefinida que comezou a principios de outubro, para evitar riscos de contaxio da covid-19.
Mediante un comunicado, o comité de empresa informou os traballadores deste novo "protocolo para evitar contaxios", dado que "estamos na segunda onda" da pandemia e, no caso de San Cibrao, "está a entrar con máis virulencia que a anterior".
Por iso, este órgano avisou de que "ata que as cifras de contaxio melloren, será o comité de empresa, a través das súas seccións sindicais, o encargado de manter sempre a cinco persoas no campamento", que é "o número máximo permitido".
Por iso, pídelles "aos traballadores que non acudan ao campamento sen antes estar apuntados para realizar a garda correspondente". Ademais, "rógase ao persoal que manteña a distancia de seguridade" e a "máscara posta".
Entre outras medidas, na cautelar, cuxa solicitude foi avaliada nunha vista oral o pasado 28 de outubro, pídese a paralización do Ere presentado por Alcoa, así como que se lle impida á multinacional apagar as cubas de electrolisis, ata que haxa por parte dos tribunais unha sentenza sobre o proceso de despedimento colectivo.
