O presidente do comité de empresa de Alcoa, José Antonio Zan, sinalou que se o Goberno e a multinacional están negociando a eventual venda da factoría de San Cibrao "lévano en segredo".
"Se están a negociar lévano en segredo, o cal é mellor", agregou o sindicalista de Comisións Obreiras. Sexa como sexa, apelou a que o que necesita o persoal é que na reunión que este venres manterán "en teoría" haxa "avances".
"Que teñamos unha proposta de solución por Alcoa e o Goberno e podamos avanzar no proceso de venda e quitarnos de encima esta espada de Damocles", incidiu Zan.
Ese encontro aínda non foi convocado, aínda que Zan advirte que "Alcoa lanzará unha contraoferta ao Goberno" na cita. "A reunión sería co Goberno, logo Alcoa tennos que convocar a nós", explicou.
Tamén aproveitou para celebrar que o Tribunal Supremo inadmitira o recurso da compañía ás cautelares que impediron a paralización da actividade en Cervo.
Isto condúcelle a destacar que "hai unha boa dilixencia polos tribunais que están a ser, a parte de xustos, rápidos".
O Supremo, o 20 de outubro
"O 20 de outubro temos o recurso á sentenza do ERE. Aí pode haber un punto de inflexión. O que cremos é que non se ten que deixar encima da xustiza a responsabilidade para que un país siga producindo aluminio ou non. Queremos que sente Alcoa a negociar de verdade e vender está fábrica", subliñou.
De momento, os traballadores seguen producindo aluminio, e mantense esa redución dun "once por cento" desde que se impuxo esa rebaixa na produción en xuño de 2019.
"O que necesitamos non é producir máis ou menos, o que queremos é claridade e certezas porque a xente está moi angustiada. Levamos un ano e dous meses sen saber se nos van a despedir ou non. Vivir con esa angustia ao final á xente pásalle factura e a comarca da Mariña está cunha redución económica brutal e necesitamos que rexurda", reivindicou.
