O presidente do comité de empresa da factoría de Alcoa en San Cibrao, José Antonio Zan, calculou que a multinacional americana deixará de facturar a finais deste ano 2020 "máis de 150 millóns de euros" no marco da folga indefinida do persoal.
Estas non "ganancias" son consecuencia do paro que vai para mes e medio (empezou o 4 de outubro) e que se manterá incluso máis aló do 3 de decembro, que é cando o Tribunal Superior de Xustiza de Galicia fixou o xuízo sobre o expediente de regulación de emprego (Ere) a 524 traballadores.
Zan sinalou que "de momento non se puxo ninguén" en contacto coa representación laboral, "nin empresa, nin tampouco o Goberno" central.
O sindicalista de Comisións Obreiras puxo o acento na "repercusión" que está a ter o paro "nas contas" da empresa por non dar saída "ao material que está dentro da planta".
Así, cifra en 50 millóns de euros o que se deixaría de ingresar cada mes, que a final de ano poderíanse traducir en "máis de 150" millóns de euros.
"Ese é diñeiro que non se factura. Nós temos que seguir producindo, non se produce aluminio para vender, só producimos para que non se paren as cubas e polo tanto a actividade", recordou.