O comité de empresa da factoría Alcoa en San Cibrao convoca para o venres aos partidos políticos para exporlles de primeira man a grave situación que atravesa a industria electrointensiva do aluminio.
Ademais, preguntaranlles polas propostas de solución ao problema da enerxía que lles entregaron ao final da marcha do pasado luns 29, pois ao seu entender son a única causa real do anuncio de peche das plantas da Coruña e Avilés.
O presidente do comité, José Paleo, di que nin o custo das materias primas, nin o uso da tecnoloxía ‘soderberg' son determinantes, dado que a planta de Lista (Noruega), que a emprega, dá beneficios. Os tribunais de Holanda fixaron unha vista sobre o Ere, cuxa paralización pide o comité europeo.
Por outra banda, os comités de Aludium en Alacante e Amorebieta anunciaron que o mércores 7 farán un parón diante das súas fábricas en solidariedade.
