O presidente do comité de empresa da factoría de Alcoa en San Cibrao, en Cervo, José Antonio Zan, asegurou este martes que quen ten que "abrir" a negociación coa multinacional é "o Goberno", para darlle xa saída a un conflito enquistado.
Zan comentou que "o primeiro" que esixían "era que o Goberno fose quen dese o primeiro paso, que convocase esa mesa multilateral e que dese solución á nosa problemática". "é o Goberno o que ten que facelo e é o que ten que abrir a negociación coa empresa porque seguir encallados non lle serve nin ao Goberno nin a nós", subliñou.
Ademais, este sindicalista de Comisións Obreiras puntualizou que esa mesa multilateral convocada polo Ministerio de Industria a próxima semana compona as dúas administracións, Goberno central e Xunta, pero "sen Alcoa".
Zan censurou que a convocatoria "vai tarde, con máis dun mes de atraso", pero aínda así confía que "teñan unha solución". "E dígannos que empezaron as negociacións pola contra mal iriamos", apostilou.
Así mesmo, o presidente do comité de empresa apuntou que "a intervención ou a venda" aos traballadores dálles "igual" porque o que perseguen "é que se manteñan o cento por cento dos postos de traballo e o cento por cento da produción". "Calquera das dúas solucións dános igual, que sexa venda ou intervención", matizou.
Seguidamente avanzou que continuarán coas "mobilizacións" aínda que "máis pensadas e máis rebuscadas para evitar ser un foco de contaxio de Covid". "Como fixemos ata agora que mantivemos o Covid fóra da fábrica e fóra da Mariña", abundou. "Temos que facer mobilizacións con menos persoas", concluíu.
