O comité de empresa de Alcoa manterá na semana que entra as primeiras reunións cos posibles compradores para a planta de Aluminio do complexo industrial de San Cibrao. Así o avanzou este domingo o presidente do comité de empresa, José Antonio Zan, na concentración celebrada en Xove recordar que o pasado venres se cumpriu un ano da presentación do Expediente de Regulación de Emprego (Ere) para 524 traballadores.
"Ata o momento só hai un comprador", asegurou Zan en alusión a Liberty, "o resto son empresas interesadas en presentar unha oferta, pero ata que esta non estea encima da mesa non hai comprador". Precisamente será Liberty o primeiro dos compradores que se achegue a San Cibrao na que será xa a súa segunda visita posto que no seu momento o comité xa se reuniu cos directivos da multinacional británica para coñecer os seus proxectos para a fábrica durante a negociación que mantivo Alcoa con eles o verán pasado.
Desde o comité insistiron en que ten que ser a Sociedade Estatal de Participacións Industriais (Sepi) a que actúe de intermediario na venda para ter garantías de que esta se fai a un proxecto viable e con futuro. Por iso, desde o comité tamén anunciaron que durante os próximos dous meses visitarán dous concellos á semana "para esixir o seu apoio a unha moción a favor de que a Sepi cumpra coa súa palabra e co mandato do Parlamento galego e do Congreso e haxa unha intervención pública temporal para a venda, despois, a un terceiro".
E é que os traballadores non queren verse na situación que están a atravesar agora as antigas plantas de Alcoa na Coruña e Avilés, que logo da venda e de varias vicisitudes están nos xulgados para dirimir unha operación sobre a que sempre planeou a sombra da dúbida.
Os traballadores pedirán aos concellos que apoien unha moción para que a Sepi actúe de intermediario na venda e continuarán coas mobilizacións
Ademais "para que a Sepi cumpra", o comité avanzou que volverán saír á rúa "con mobilizacións puntuais, pero ás que asista todo o mundo" para facer ver ao Goberno que se seguirá loitando ata que se consiga".
Neste sentido, os representantes dos traballadores encomiaron a actitude dos traballadores, a cuxas protestas acoden na súa maioría en familia, de secundar sempre os actos previstos polo comité na loita por evitar o peche da planta. "Todos deixástesvos parte da vosa vida deste último ano neste problema; interpuxestes a fábrica e o futuro dos vosos fillos e da Mariña ao coronavirus e saístes á rúa sen medo ao contaxio", asegurou Zan, que subliñou que a pesar de que os últimos doce meses xa pasan factura e que á preocupación súmase o cansazo é necesario seguir adiante "porque sabemos quen nos ten que asinar o papel, chámase Sepi, e non imos parar ata que o consigamos".
E segundo destacaron desde o comité "mobilizarse serve para algo", dixo Xosé Paleo, da CIG, porque un ano despois do anuncio do Ere, a fábrica segue funcionando e ademais empezan a arrincarse cubas e os traballos de rebrascaje "e está ou compromiso de que non se vai parar ningunha cuba máis", dixo Paleo.
