A espera de máis dun ano do comité de empresa de Alcoa por un estatuto do consumidor electrointensivo que dea viabilidade á fábrica non ten o final desexado. A falta de analizar o documento definitivo, sostén que o proxecto "non resolve o problema", polo que presentará alegacións "co fin de chegar a un marco estable e competitivo" que sitúe á alumineira "nun estado de igualdade" co resto dos seus competidores na UE.
A primeira valoración do comité é que a redución na tarifa eléctrica co novo marco sería "como máximo" de 12,5 euros o megawatt (MW) sumando as compensacións por emisións de CO2 ao máximo permitido pola UE e a nova medida de eliminar o 85% dos cargos da factura eléctrica de renovables, cogeneración e extrapeninsulares. Comparan esa cifra coa do ano pasado, cando entre a interrompibilidade —que agora desaparece— e o CO2 a rebaixa no prezo foi de 17 euros o MW. "O goberno reduce as axudas á industria electrointensiva en 4,5 euros o MW con respecto ao 2019", conclúe o comité, que cifra que o prezo da electricidade para Alcoa roldará este ano os 47,5 euros coas novas medidas, e non os 40-42 que di o Goberno.
As firmas que precisan maior axuda son as máis agraviadas, di a Xunta
O comité analiza cada unha das tres medidas que compoñen o documento e sobre a compensación por emisións de CO2 ve "necesario" que o Goberno "cumpra o seu compromiso" de aumentar a dotación ao máximo permitido pola UE, 200 millóns —en 2019 repartíronse 172— e asegure "a longo prazo" esta compensación "cunha lexislación clara".
Sobre a bonificación na factura sostén que, "moi lonxe das pretensións dun bo estatuto", esta medida deixa á empresa "nunha situación moi pouco competitiva" con respecto a outros países da UE e esixe "unha baixada nas peaxes de transporte e xeración" para as industrias que máis consomen. Neste sentido insisten en que é necesaria unha "diferenciación inequívoca" entre os grandes e medianos ou pequenos consumidores xa que o novo estatuto rebaixou o mínimo de consumo anual dos seus beneficiarios de 40 GW hora anuais a só 1 GW e son 600 empresas as que entran no cómputo, cando co anterior borrador de estatuto eran 276. Con esta decisión Alcoa San Cibrao, que consome "3,5 millóns de MW" —e paga 220 millóns ao ano de luz— queda "á mesma altura que unha empresa moito máis pequena".
CIG, UXT e CC OO tamén farán as súas propostas e esixen garantías de emprego
En canto ao fomento de contratos bilaterais (PPAs) con empresas de enerxías renovables cren que é unha medida "de dubidoso cumprimento, dado o oligopolio das eléctricas e a falta de regulación por parte do Goberno". Explican que o Executivo debe lexislar sobre este asunto para obrigar tamén á subministradora a realizar estes contratos —o estatuto fixa que deben ser por un mínimo de 5 anos e un 10% do consumo anual—, pois cren que ningunha eléctrica asinará un acordo cunha gran consumidora para proporcionarlle enerxía cun prezo de 40 euros o MW hora cando no mercado do resto de consumidores véndeo máis caro e polo tanto deixaría de gañar diñeiro.
