O presidente do comité de empresa de Alcoa, José Antonio Zan, confía en que pronto se produzan "novidades" sobre a venda da factoría cervense de San Cibrao "probablemente a semana que vén", aclara, e espera que "empecen a frutificar as negociacións e todas as conversacións" entre a compañía, Sepi e Liberty House.
José Antonio Zan indicou que tanto el como o resto do comité de empresa esperan que canto antes cheguen a un acordo e que ese sirva para pór as bases da proposta final, "que se enmarca en grandes acordos económicos sobre o prezo, sobre o tipo de contrato de alúmina, sobre como van xestionar as dúas plantas (Aluminio e Alúmina) e como se soluciona o problema".
Zan insiste na importancia de solucionar "o problema" de que dentro dunha única factoría "haxa dúas plantas de produción diferentes. Ese acordo xeral pódese plasmar a semana que vén e contar xa con algunha novidade", desexa.
O presidente do comité de empresa recoñece non ter moita información oficial sobre a venda, aínda que avanzou unha próxima reunión con Alcoa antes do 22, como parte dun acordo para facer seguimento das negociacións.
"Confiamos na palabra que nos deron tanto os dous ministerios (Industria e Transición Ecolóxica) como a Xunta e o avogado do Estado de que isto vai ir rápido e cremos que non vai tardar moito, xa que a outra vez quedáronse, o 27 de setembro, moi próximos a ese acordo", concluíu Zan.
