O presidente do comité de empresa de Alcoa en San Cibrao, José Antonio Zan, deixou aberta a posibilidade de que se aceleren as negociacións e a venda da factoría de aluminio se produza antes do 30 de abril. 

A multinacional, logo da reunión multilateral celebrada este luns, apelou ao seu compromiso de negociar de boa "fe" para alcanzar o acordo de venda á Sociedade Estatal de Patentes Industriais (Sepi), marcándose como data para culminar todo o proceso o 30 de abril. Zan saudou con "optimismo" este compromiso, aínda que "satisfeitos" non estarán "ata que estea asinado" o contrato de venda á Sepi. 

"É un punto de partida bastante bo, van comezar as negociacións e esperamos que estean xa funcionando os equipos de traballo, porque é algo fundamental ter unha base sobre o que serán as negociacións", resaltou. 

Ademais, o presidente do comité de empresa invocou o dito pola multinacional americana sobre que "estaba interesada en chegar canto antes a un acordo, incluso antes da data marcada". "É bo que queira chegar a un peche das negociacións antes diso, para ter o acordo antes do 30 de abril", dixo. 

Tanto é así que Zan interpreta "que se esta semana empezan a negociar, esta semana ou a que vén vai haber grandes noticias". 

"Sabemos que é un proceso que vai ir rápido. Normalmente unha venda desta clase, dunha fábrica deste tamaño e cos millóns que factura, sobre 700 ao ano, adoita ser unha venda longa, e así a de Dunkerque tardou un ano en ser efectiva. Se nós o facemos de aquí a tres meses vai ser unha venda exprés", subliñou. 

Pola súa banda, ten claro que a venda á Sepi producirase e que esta posteriormente traspasaraa á británica Liberty, da que destaca que, "se realiza todas as operacións que está a dicir que vai facer en canto a investimentos e tal como está o mercado", ve "un futuro moi prometedor". "A Sepi o único que fai é ser un mero transmisor das empresas, para vendelas, e é importante que estea a Sepi porque dá garantía xurídica a Alcoa e garantía xurídica aos traballadores", subliña.