VIVEIRO. A asociación Casco Antigo de Viveiro, que onte aprobou a acta de constitución, os estatutos e elixiu xunta directiva provisional, considera que a loita contra a praga de gaivotas é unha prioridade. De feito, a primeira medida que reclamará ao Concello, no escrito que prevé rexistrar durante a próxima semana, incluirá a reivindicación de que se aprobe unha partida de entre 8.000 e 10.000 euros co propósito de que a Administración local xestione e poña en marcha actuacións contra a proliferación destas aves na cidade.
Os impulsores da asociación consideran que non é unha cantidade económica elevada, debido ao «gran impacto que causa, polo malestar que hai e todo ou ruído e trastornos que ocasionan as gaivotas, non é esaxerado», recalca Samuel Fernández. «A xente está moi sensibilizada polas gaivotas, que son un problema gordo que afecta ao bo devir do centro histórico viveirés», abunda o representante veciñal.
Os promotores da creación do novo colectivo veciñal levaron á reunión, desenvolvida no multiusos, unha candidatura a medio perfilar, encabezada polo arquitecto e profesor Francisco Hermida Trastoy, ao que acompaña como vicepresidente Samuel Fernández. Socorro Giz é a secretaria, Paula Naval exercerá de tesoureira e como vocais van Concepción Berdeal e Heriberto Cruz.
A preparación do encontro permitiu axilizar o desenvolvemento da asemblea, que contou con moita participación. Unha vez que os asistentes reciban a acta poderán ratificar os acordos adoptados ou presentar algunha alegación.
Os promotores da creación desta asociación tamén trataron de acordar cos presentes as propostas que presentarán aos responsables municipais nos próximos días, unha vez que poidan dar de alta o colectivo no rexistro autonómico para solicitar o CIF correspondente. O seu obxectivo é preparar un escrito para rexistralo canto antes no Concello vivariense, dada a inquietude que suscitan algúns temas entre a veciñanza.
A determinación dunha cota anual foi outro dos puntos da reunión. A proposta foi de 5 euros anuais para que lles permita facer fronte a 35 euros de taxas, selos, cartas e outros gastos administrativos, pero non prevén que por agora sexa necesario establecer unha contía maior.
O nome proposto para o colectivo foi Asociación de Veciños do Casco Antigo de Viveiro, que nace co obxectivo de solucionar os problemas que ten a cidade do Landro, entre os que tamén figura a actitude incívica dos donos de cans que non recollen as súas feces.
