Varios establecementos comerciais, pero sobre todo restaurantes, alertaron de que nos últimos días en locais de Ribadeo e Barreiros están a realizar pagos con billetes falsos de 50 euros. Este diario tivo constancia de que sucedeu polo menos en tres restaurantes e unha tenda de agasallos.
En todos os casos o procedemento foi similar xa que se trata dunha ou dúas persoas que acoden ao establecemento. Son un home e unha muller, aínda que o home figura en todos os relatos. Non así a muller. Compórtanse sempre con total normalidade e sen levantar ningún tipo de sospeita. No caso dos restaurantes fan unha comida á carta e, unha vez finalizada, piden a conta, que pagan en metálico e con ese tipo de billetes que entregan ao camareiro.
Os casos consultados ata o momento producíronse en locais nos que funcionan as máquinas automáticas que detectan billetes falsificados tras pasalos por un chequeador e devolven o cambio exacto.
Nese momento a máquina detecta que o billete é falso e non o acepta. Con todo, para cando o camareiro regresa cos clientes para advertirlles do que sucede, estes xa se marcharon, algo que fan sempre con discreción e sen levantar ningún tipo de sospeita entre o resto de comensais do restaurante.
As máquinas detectan os billetes falsos pero os clientes escápanse
No caso do comercio o procedemento foi similar, aínda que moito máis rápido porque marcharon de forma atropelada tras a entrega do billete.
As operacións con billetes falsos son relativamente habituais. As máquinas que os escanean para detectar se son falsos obrigan aos estafadores a perfeccionar a calidade do seu traballo, aínda que en casos como estes, non ten importancia.
