Os datos turísticos da Mariña deste verán poden considerarse positivos tendo en conta a situación actual de crise sanitaria que provocou unha redución importante do fluxo de visitantes. O confinamento ao que estivo sometida a comarca en xullo polo rebrote de casos de Covid-19 deixou un mes con malas cifras e unha fervenza de cancelacións que puxo en albas a todo o sector hostaleiro, pero o mes de agosto conseguiu remontar os malos presaxios e os bos datos de visitantes, similares aos dun verán normal, conseguiron salvar unha parte do verán no sector turístico. Agora a hostalería está á expectativa do que ocorra en setembro, un mes no que a comarca aínda rexistraba un bo fluxo de visitantes nos últimos anos.
Neste sentido pronunciouse este mércores o concelleiro de turismo de Ribadeo, Pablo Vizoso, que cifrou en 25.979 as persoas que pasaron polas oficinas de turismo da vila e da praia das Catedrais este verán. "Este foi un verán atípico marcado polo confinamento de xullo, pola ausencia de grupos organizados e pola presenza testemuñal de peregrinos", asegurou. En cifras, Vizoso explicou que a oficina de turismo da vila rexistrou este verán 10.831 viaxeiros, 2.683 en xullo e 8.148 en agosto. E nas Catedrais rexistráronse 4.877 consultas en xullo e 10.271 en agosto. En canto á ocupación hostaleira, Vizoso cifrouna entre o 25 e o 50% en xullo e en torno ao 75% en agosto con días do 90%. A maioría dos visitantes proceden de Madrid, País Vasco e Cataluña, principalmente e tamén de Castela León, Valencia ou Andalucía. Vizoso tamén fixo un balance moi positivo das actividades de natureza e culturais que organizou o Concello e que atraeron un gran número de visitantes.
En Foz tamén se rexistrou un mes de agosto similar ao de veráns anteriores. "Estamos moderadamente contentos coas cifras de agosto, que foi practicamente normal, despois dun mes de xullo cunha caída de visitantes moi importante", recoñece o alcalde, Fran Cajoto, que subliña que o programa cultural na rúa con actuacións musicais ou cine contribuíu a crear un ambiente nas rúas "de referencia na Mariña". "Hai que ser optimistas e pensar en que pouco a pouco se vai ir mellorando", engadiu.
Outro destino de referencia na comarca é Viveiro. "Estabamos algo escépticos polas cancelacións de xullo co rebrote, pero agosto foi impresionante a pesar de que non houbo festas nin os eventos doutros anos", recoñece a alcaldesa, María Loureiro que subliñou que "Viveiro véndese só". "A chegada de visitantes é froito do traballo de fondo que leva realizando desde hai anos na concellaría de turismo e que fai que a xente se achegue a Viveiro para coñecer a contorna", asegura e subliña que esperan que en setembro se manteña algo de ambiente.
E en Burela, onde nos últimos anos vivíase unha progresión á alza das cifras de visitantes, tampouco se deu un mal agosto aínda que con datos inferiores ao resto de veráns. Así, o mes pasado a oficina de turismo rexistrou 1.086 visitantes e o barco museo recibiu a 685 persoas. "Dadas as circunstancias e a caída xeralizada do turismo estamos relativamente contentos con agosto, pero ou mes de xullo perdeuse todo", recoñece o concelleiro de turismo, Ramiro Fernández Rey, que destaca a boa acollida das rutas xeolóxicas que levaron a cabo.
