A estrea do Pescados Rubén Burela FS na tempada de Primeira División de fútbol sala non puido ser máis feliz. A vitoria ante o Cartaxena (5-2) deixou varios nomes propios entre as tropas laranxas, como a meta Edu, que detivo varios dobres penaltis; Javi Rodríguez, autor de dúas asistencias, ou Iago Míguez, que demostrou estar plenamente recuperado da lesión e tamén deu unha asistencia. Pero se un xogador destacou na faceta ofensiva foi o arzúano Diego Quintela, que no seu primeiro encontro oficial no pavillón de Vista Alegre contribuíu cun dobrete a conseguir os tres puntos, anotando ademais os dous primeiros goles, e demostrando que pode ser unha gran axuda para Matamoros, que tamén marcou, á hora de responsabilizarse na faceta realizadora.
Quintela mostrouse entusiasmado co arranque, tanto a nivel individual como colectivo. "Non podo estar máis feliz, logo de 15 meses sen xogar un partido oficial hei podido axudar a conseguir o triunfo na liga, sinto especialmente contento polos meus compañeiros e polo corpo técnico", resumiu.
O pivote arzuán considera que o encontro ante o Cartaxena foi o premio a todo o traballo desenvolvido durante os dous últimos meses. "Foi unha pretemporada atípica, dura e longa, pero queda compensada con este bo comezo, con tres puntos ante un rival enorme", explicou Quintela, que falou tamén dos seus dous goles. "Aos xogadores que estamos máis cerca da área rival motívanos moito marcar, pero sobre todo se serve para axudar a gañar, como foi o caso", sentenciou.
Para o novo xogador do Pescados Rubén o triunfo non chegou por casualidade, senón porque o equipo traballou en función de todo o que adestrara. "Durante o partido levamos a cabo moitas das xogadas que ensaiaramos durante os adestramentos, non saíron porque si", sinalou o pivote, que, igual que fixo o seu técnico, ve marxe de mellora. "Co 3-1 tivemos unha superioridade para deixar o partido sentenciado e non a aproveitamos. Isto fixo que o rival se crecese e aí estivo Edu enorme para salvarnos en momentos craves", concluíu o pivote do cadro burelense.
