O Concello de Cervo xa iniciou os trámites para declarar a caducidade das licenzas urbanísticas dos dous esqueletos da rúa Bellavista, na zona de Galdín, en San Cibrao. Segundo indicaron este mércores desde o Concello este proceso empezou xa a principios de mes ao contar cos correspondentes informes da Policía Local e da oficina técnica que ratifican que non hai ningún tipo de actividade nestas edificacións desde hai moito tempo. "Este procedemento é a forma legal que ratifica que as obras iniciadas non poden continuar ao non existir ningún permiso en vigor que as ampare", asegurou este mércores o alcalde, Alfonso Villares, "as construcións, unha vez chegue a termo este trámite, xa non estarían avaladas por ningún título xurídico administrativo".
Neste sentido, o rexedor subliñou que desde o goberno están a dar "pasos importantes" para lograr que os propietarios "ou ben rematen as construcións que deixaron inacabadas ou ben devolvan os terreos ao seu estado orixinal, o que supón o derrube destas edificacións que quedaron inconclusas no noso termo municipal".
Villares tamén puxo o acento en que desde o Concello están a traballar en acabar con todas estas estruturas "pensando en todos os cervenses e tamén loxicamente por motivos de seguridade e ornato público". O proceso para conseguir este fin "é complexo, pero estamos a dar os pasos precisos, sen demora, para conseguir eliminar todos estes esqueletos do noso municipio".
PERMISOS. As licenzas de Galdín foron concedidas a Os Molineros e á inmobiliaria Pasillo Verde. A dos Molineros foi dada en 2006 e amparaba a realización dun edificio de 180 vivendas, garaxes e faiados nun total de 22.926 metros cadrados. E a de Pasillo Verde foi dada entre 2006 e 2007 para actuar en 60.145 metros cadrados distribuídos en dous sotos, seis plantas altas e baixo cuberta.
Posta en valor da zona
Neste caso non supón só os derrubes previstos senón tamén a posta en valor esa zona, posto que alberga os restos dun castro, que se converterá en atractivo para o municipio.
