A delegación de cultura e educación do Concello de Cervo ten en marcha Cervo ao carón do voluntariado sénior, un programa pensado para as persoas maiores de 55 anos e no que participan unha trintena de homes e mulleres. "Buscamos fomentar a implicación deste sector da poboación no desenvolvemento cultural e social do noso municipio, que se involucre ao cento por cento na posta en marcha de diferentes iniciativas que conforman o noso proxecto e que dinamizan o municipio", explicou a concelleira da área, Dolores García Caramés.
Un dos eixos principais do programa foi Cervo no Camiño, unha iniciativa para poñer en valor a ruta xacobea, no tramo coñecido como o Camiño do Mar no municipio. Logo das camiñadas por Cervo, unha decena de voluntarios guiaron a medio centenar de veciños nas diferentes etapas do Camiño Francés.
Outra das actividades do programa implica o encontro destes voluntarios con alumnado dos centros escolares para compartir anécdotas e experiencias, "co obxectivo de xerar espazos de convivencia nos que, a través da comunicación interxeracional, poidan chegar a comprender xeracións que son tan distantes". O terceiro alicerce do programa está enfocado á recuperación histórica e os voluntarios están a realizar entrevistas a persoas maiores que lles achegan as súas vivencias.
María Rogelia Campo Abad: "É unha experiencia moi satisfactoria que che axuda a relacionarte con outras persoas e a ter vivencias novas"
TESTEMUÑO. Unha desas voluntarias é María Rogelia Campo Abad, xubilada de 67 anos, que atopou neste programa un novo xeito de relacionarse. "Todo empezou polo Camiño de Santiago", explica, "nunca me animara a facelo, pero como era por etapas cada domingo animeime e a partir de aí xa me metín no programa de voluntariado". "É unha experiencia moi satisfactoria, que che axuda a relacionarte con outras persoas, a ter vivencias que nunca pensache que terías e ademais hai moito compañeirismo", asegura esta filla de mariñeiro, que ademais do voluntariado tamén está integrada na asociación Mujeres de San Ciprián, "porque deste xeito estou moi activa".
Rogelia agradece participar en actividades como esta do voluntariado porque estas iniciativas "anímante a saír da casa e a facer cousas fóra, porque en pobos pequenos coma estes non hai moito que facer para unha persoa xubilada que ten máis tempo libre". Tamén destaca a oportunidade de coñecer outras experiencias, como as que lles transmiten as entrevistas que realiza agora.
Esta voluntaria espera que o programa teña continuidade e vaian xurdindo novas actividades nas que involucrarse.
