O alcalde de Cervo, Afonso Villares, avanzou este mércores que un dos obxectivos do Plan de Especial Protección do Xacemento da Atalaia é transformar o xacemento nun parque museo arqueolóxico urbano, "garantindo a adecuada conservación das estruturas orixinais e expropiando as parcelas necesarias para que o ámbito sexa de propiedade pública, o que nos permitiría demoler as edificacións que hai na zona". Desta forma, subliñou que se conseguirá "un novo recurso de turismo cultural de gran relevancia para a nosa zona".
Villares fixo estas declaracións ao mesmo tempo que anunciou a aprobación inicial do plan en xunta de goberno. Segundo explicaron desde o Concello, o documento foi referendado logo de recibir os informes favorables da Dirección Xeral de Ordenación do Territorio e Urbanismo, a Consellería de Medio Ambiente, Territorio e Vivenda; a Dirección Xeral de Mobilidade, a Dirección Xeral de Patrimonio Cultural e a Dirección Xeral de Pesca, Acuicultura e Innovación Tecnolóxica.
Este plan, que delimita os 20.000 metros cadrados afectados o xacemento, regula os usos permitidos, compatibles e prohibidos sobre os elementos protexidos, así como as actuacións de recuperación, rehabilitación ou mellora da superficie que se prevé preservar con estas medidas.
Tras esta aprobación ábrese un período de exposición pública por un período de dous meses e queda suspendida a concesión de licenzas no territorio que comprende o plan.
"Este novo paso dado responde ao obxectivo de preservar e poñer en valor o castro da Atalaia, como unha das pedras angulares do patrimonio cultural que atesoura o noso municipio, polo seu carácter histórico e o seu singular valor arquitectónico", asegurou Villares, que precisou que o plan posto en marcha "primará a protección integral do xacemento sobre calquera outro criterio de desenvolvemento urbano, garantindo unha mínima intervención no mesmo de cara a favorecer o desfrute do asentamento".
