O número de casos activos no brote da Mariña séguese reducindo. O balance da Consellería de Sanidade deste martes reflicte sete infeccións menos que o do luns, co que son 79. O motivo é que se rexistraron tres novos positivos nas últimas 24 horas, e tamén dez altas.
É unha tendencia á baixa que permite presaxiar un previsible desconfinamiento de Burela, que segue reducindo casos e pasou na última xornada de 53 a 45.
Tamén descenderon os ingresados no Hospital Público da Mariña, onde hai internadas tres persoas, unha menos que o luns.
A Xunta destaca que todos os novos positivos que se detectan nesta área están relacionados co brote, "o que permite seguir a trazabilidade dos casos e continuar na estratexia de busca activa de contactos".
No caso do foco de orixe familiar detectado a semana pasada en Vilalba, que se estendeu ao municipio veciño de Xermade, non se sumaron novos positivos aos seis diagnosticados. Catro dos infectados están en Vilalba e os outros dous, en Xermade.
Os casos activos na comunidade seguen en descenso, e este martes son 178
GALICIA. No conxunto de Galicia, os últimos datos da Dirección Xeral de Saúde Pública reflicten 178 casos activos de Covid, 24 menos que os rexistrados este luns.
Por áreas, 106 dos casos activos corresponden á da provincia de Lugo, que experimenta un forte descenso con 30 menos.
Mentres, súmanse catro, ata chegar a 31 os rexistrados na área sanitaria da Coruña. Ademais, detectouse un novo caso Vigo, área sanitaria na que ascenden a 18; e outro en Santiago, onde hai 9. Pontevedra mantense con nove e Ourense con cinco, e en Ferrol non hai ningún caso activo.
Do total de pacientes positivos na comunidade, sete están hospitalizados —ningún en coidados intensivos— e 171 no domicilio.
Ata o momento, en Galicia superaron o virus 11.116 persoas e rexistráronse 619 falecementos. Realizáronse 235.064 probas PCR.
