A presidenta da Comisión de Igualdade do Congreso dos Deputados e exministra, Carmen Calvo, pechará este venres 20 de maio o ciclo de conferencias Maruja Mallo. Viveiro e a vangarda do século XX.
Nos últimos meses, o Concello de Viveiro programou diversos relatorios para achegarse á figura da artista viveirense. A deste venres, será ás 12.00 horas na Sala Multiusos da Casa Consistorial, con entrada gratuíta ata completar aforamento.
Carmen Calvo será a última relatora destas conferencias, que comezaron o pasado mes de marzo. Nestes meses, expertos e expertas ofreceron o seu coñecemento sobre a figura de Mallo.
A alcaldesa de Viveiro, María Loureiro, que agradece a presenza de Calvo, recibirá á deputada socialista no Concello o venres, onde asinará no libro. Carmen Calvo tamén terá ocasión de visitar a casa onde naceu Maruja Mallo, situada na avenida de Lourdes.