A Mariña estivo este ano dobremente representada na gala para elixir os candidatos de cada comunidade autónoma que competirán pola coroa de Miss e Míster España, coa presenza da focense Aitana Paradela e do vivariense David Quevedo. Ningún dos dous gañou, pero ambos quedan coa importante experiencia vivida durante catro días en Madrid.
Ata alí viaxaron o xoves os dous representantes mariñáns para participar en diversos actos, entre eles unha visita ao Casino, que foi das cousas diferentes que destaca David, á que Aitana suma un tour pola capital, aínda que os dous coinciden en que o mellor de todo foi a convivencia con outros mozos e mozas do resto de comunidades.
"Eu quería vivir a experiencia e mereceu moito a pena", conta Aitana
"Quedo con toda a xente que coñecín. Foi xenial e xa teño varias viaxes pendentes a varias partes de España", confesa a moza focense, case ao unísono co seu compañeiro vivariense, ao que tamén lle quedou a espiral de viaxar para volver ver a algún dos seus compañeiros. "Teño que ir ata Melilla", asevera David, quen ten clarísimo que repetiría a experiencia.
"Pasámolo xenial", conta o mozo, que durante a súa estancia en Madrid non descoidou os seus estudos, porque hoxe mesmo tiña un exame na facultade de Químicas da Coruña. "Levantábame para estudar todos os días ás sete aínda que non empezabamos ata as dez", conta xusto tras o exame, "ao que non puiden dedicar todo o tempo que quixen, pero non me saíu mal", afirma.
Para Aitana, feliz tamén porque elixiron a unha compañeira da súa mesma axencia, a experiencia mereceu a pena. "Foron como unhas minivacacións" e se atopou moi segura desfilando, do mesmo xeito que David, porque os dous teñen experiencia tanto en pases como en modelos para fotógrafos, "e máis ou menos todos os desfiles son iguais", conta o vivariense. "Eu quería vivir a experiencia e mereceu moito a pena", conta a moza focense.
