O Pescados Rubén Burela FSF prepara o seu reingreso na competición da Primeira División feminina logo de case un mes sen xogar por diferentes motivos. O cadro mariñán visitará o sábado á Universidade de Alacante, un rival directo na pelexa polos primeiros postos, co obxectivo de recuperar o liderado en solitario, xa que agora compárteo co Alcorcón, que leva disputados dous partidos máis que as mariñás.
O cadro burelense disputou o seu último encontro ligueiro o día 12 de decembro, en Melilla, para finalizar a primeira volta como líder do grupo. Despois xogou dous partidos máis, un da Copa da Raíña, na pista do Marín, o día, para avanzar aos cuartos de final do torne, e conquistou a Supercopa no pavillón Vista Alegre co Poio como rival, o día 9 de xaneiro.
Tras o título alcanzado o 9 de xaneiro, o conxunto mariñán preparábase para xogar fronte ao Alcorcón na Vista Alegre, pero o conxunto madrileño solicitou o adiamento debido aos seus problemas para poder adestrar pola gran nevada caída durante a semana en Madrid. Tras consumarse o adiamento, entrou en xogo o covid, ao sufrir un positivo unha xogadora do club laranxa, o que derivou tamén nunha corentena doutras compañeiras e a consecuente suspensión da visita a Zaragoza, onde debía enfrontarse ao Intersala Promises, o día 23. Polo mesmo motivo quedou aprazado tamén o encontro do día 30, fronte ao Móstoles, que debía xogarse na Vista Alegre.
A pesar da irrupción do virus, o cadro burelense conseguiu manter unha certa rutina de adestramentos coas xogadoras que non se viron afectadas pola corentena e aos poucos fóronse incorporando o resto, aínda que o cadro laranxa non chegará á cita levantina nas mellores condicións, sobre todo pola falta de ritmo competitivo. Tamén é certo que o Alacante se atopa nunha situación semellante porque tampouco non disputou ningún partido na segunda volta e o seu último choque oficial tivo lugar o 12 de decembro. As alacantinas ocupan a sexta praza, con 12 puntos, e na primeira volta perderon 2-0 no pavillón Vista Alegre.
Unha das xogadoras que está xa preparando o partido é Ale de Paz, que explica que o equipo "vai volvendo aos poucos á normalidade" logo dunha situación que atravesaron xa moitos clubs nesta tempada. "Todos convivimos coa posibilidade dos contagios e non hai que darlle moitas voltas. A planificación é complicada porque podes estar a preparar un partido unha semana e o xoves ou o venres o partido aprázase. é o que hai, só pódese traballar día a día e iso é o que tratamos de facer", explica a xogadora, consciente de que non será fácil recuperar os partidos aprazados antes do final da primeira fase. "Nós podemos xogar entre semana, pero o resto dos equipos non son profesionais e terán máis complicado poder viaxar e xogar entre semana", sinalou a xogadora.
MÉRITOS PROPIOS. Desde a súa chegada a Burela, no verán de 2019, Ale de Paz sumou case todos os títulos que se puxeron en xogo, o último a Supercopa de España, ademais de ser elixido o club como o mellor do mundo do fútbol sala feminino. A xogadora de Neda considera que nada disto é froito da casualidade e que directivos, técnicos, xogadoras e afeccionados levan remando do mesmo lado para conquistar todos os obxectivos marcados.
"Estamos a demostrar unha regularidade tremenda, xa que din que o difícil non é chegar senón manterse e nós estámolo conseguindo. Desde a Copa da Raíña 2018-19 gañamos todo o que xogamos e iso ten unha dificultade enorme", sinala a xogadora, engadindo respecto ao galardón recibido a semana pasada por Futsal Planet que "para nós xa era un orgullo figurar entre os nomeados, pero gañar foi algo moi especial, aínda que os méritos están aí. Gañamos todo o que xogamos, temos ao que foi elixido como segundo mellor adestrador do mundo, Xullo Delgado, e á segunda mellor xogadora, Peque, así que sumándoo todo creo que é xusto", dixo.
