O secretario xeral do PSdeG, Gonzalo Caballero, asegurou que a "dotación de ambulancias" para a comarca da Mariña é "exigua" e "hai recortes que agravan esa situación", como "a eliminación dun técnico" da unidade medicalizada, "o que supón un retroceso moi importante" no que se refire ás dotacións sanitarias da costa de Lugo.
Gonzalo Caballero fixo estas declaracións logo da "reunión de traballo" que mantivo este mércores en Burela co colectivo de enfermeiras eventuais e con profesionais do 061 na Mariña
"Somos conscientes de que a sanidade pública galega ten moitas dificultades, derivadas das políticas de recortes", engadiu, "e mala xestión do goberno presidido por Feijóo".
De feito, sinalou que "despois de doce anos de goberno do PP na Xunta de Galicia, temos unha sanidade pública galega na que os recortes, a privatización e a precarización provocaron unha deterioración nos servizos sanitarios no conxunto do territorio", problemas que foron a causa dunha "mobilización masiva da cidadanía galega".
En canto á comarca da Mariña, dixo que ao eliminar a área sanitaria "os servizos sanitarios xa non están ancorados definitivamente ao territorio", de modo que "para acudir ás operacións máis complexas e para ter todas as prestacións sanitarias hai que desprazarse a outras zonas".
Así mesmo, denunciou a situación na que se atopa o colectivo de enfermeiras eventuais que traballan na Mariña, unhas trescentas, que chegan a ter "decenas de contratos nun mesmo mes", co que "a calidade dos servizos acaba sendo menor".
