Caballero: "En Alcoa hai que contemplar todas as vías de intervención posibles"

O secretario xeral do PSdeG, Gonzalo Caballero, asegurou este domingo que é necesario "contemplar todas as vías de intervención posibles" para evitar o peche da planta de Alcoa na Mariña e, en consecuencia, o despedimento de máis de medio cento de traballadores anunciado pola compañía.

Nunha entrevista a Radio Nacional de España, o socialista defendeu que "hai que dicirlle a Alcoa que non se pode pechar unha planta que é viable e para a cal hai un investidor, simplemente para eliminar un competidor no mercado". Este é, ao seu entender, "o argumento que cremos que ten moito peso nestes momentos". "É unha empresa estratéxica, e se o Ministerio de Industria e o Goberno de España contemplan a posibilidade de que a Sepi poida incorporar a Alcoa para poder cedelo logo a Liberty, hai que tomar todas as decisións posibles para manter esa actividade e, desde logo, hai que barallar e aplicar esa intervención que evite o peche da planta", sinalou.

Caballero avogou por "unha fronte común entre a Xunta e o Goberno para frear esa decisión de Alcoa", que considerou "unha chantaxe e un ataque aos acordos que ten a empresa para desenvolver unha negociación de boa fe". Igualmente, o líder dos socialistas galegos cre que apagar as cubas da factoría de San Cibrao "sería un enorme risco e un punto de non retorno".