Miguel Pardo Vidal é un mozo burelense de 35 anos que viaxou a Sri Lanka para tratar de localizar o seu amigo e compañeiro de traballo ao non ter noticias del e non regresar no voo previsto ata India, onde ambos traballan na empresa Profand Vayalat, filial en Kochi da viguesa Profand, dedicada ao procesado e comercialización de produtos do mar. Os peores presaxios cumpríronse e Alberto Chaves Gómez, galego de Rianxo e axudante de Pardo Vidal na firma desde o pasado setembro, é unha das dúas vítimas mortais españolas dos atentados do pasado domingo no país; a outra é a súa noiva, María González Vicente, de Pontecesures. Súmanse á arrepiante cifra de 290 falecidos.
Os dous mozos viaxaran ao país a facer turismo pois, aproveitando as vacacións de Semana Santa, María desprazouse a ver ao seu noivo. Ambos estaban en Colombo, a capital de Sri Lanka, cando se produciu a brutal cadea de atentados, un deles no hotel onde se aloxaban, o Kingsbury. "Ao parecer o estoupido collounos xantando no comedor do hotel", relata Luis Pardo, o pai de Miguel, reproducindo o que o seu fillo lles puido contar e que parece cadrar co atraso na súa identificación, porque poderían non levar a documentación enriba, xa que a explosión no hotel de luxo tivo lugar ás nove menos cuarto da mañá.
Alberto Chaves atopábase en Colombo coa súa noiva, a tamén galega María González, que viaxou desde España a visitalo
Miguel, xunto con outro dos cinco españois que traballan na empresa na India, descoñecía a sorte do seu compañeiro cando se desprazaron na súa procura e pensaron que poderían atoparse nalgún hospital, aínda que no hotel xa lles confirmaron que estaban entre os falecidos, polo que non tiveron que identificalos, algo que, segundo algunhas fontes, fixo a familia a través de fotografías das súas tatuaxes.
Unha situación que non impediu o mal momento que pasou o burelense, moi coñecido na localidade onde xogou no seu equipo de fútbol e tamén en Viveiro. "Está moi afectado, como é natural e moi nervioso", recorda o seu pai, sorprendido porque nalgún momento alguén pensou que o seu fillo era o falecido. "Nós sabiamos que non, porque falamos con el antes de viaxar a Sri Lanka", recorda e, aínda que Miguel coñece á perfección a zona, "tivo que regresar a un sitio onde onte mesmo houbo novos atentados e aloxarse nun hotel enfronte dun dous afectados", ademais de superar "impresionantes controis" que o obrigaron a estar ao redor das catro da mañá -hora local- para coller o avión de volta a Kochi.
Miguel é biólogo e leva tres anos empregado no departamento de calidade de Profand Vayalat na India, un país ao que os seus pais viaxaron o pasado ano. Tamén en Sri Lanka "e é un sitio precioso", conta Luis, que adoita falar por skype polo seu fillo. "Hoxe non hai distancias", sentenza, lamentando a fatalidade do amigo do seu fillo.
