O auditorio da casa da cultura de Burela acollerá o luns, ás oito da tarde, a proxección do audiovisual Lembranzas do Nadal en Burela, nas que se fai un repaso das celebracións desde hai décadas da man de varios dos seus protagonistas, veciños da localidade que se han sentando ante a cámara de Paco Salgueiro para recordar as festas da súa mocidade.
Preto de 40 minutos nos que veciños como Gloria da Corneta, Genucha, Piedad, Castor e Lola Vispo relatan algunhas das curiosidades do Nadal de outrora en Burela, como a lectura de poesías na igrexa por parte dos máis pequenos ou as pullas do Día dos Santos Inocentes, aproveitado na localidade para malmeter entre os veciños que non levaban demasiado ben.
Unhas festas que comezan a ser organizadas desde que na década dos setenta encárgase a sociedade recreativa Ledicia, a encargada da primeira Cabalgata de Reis e que segue organizando ata a actualidade, como conta no audiovisual Ángel Vigo, un dos seus socios fundadores, que incluso revela que fixeron intentos para que un ano os Magos chegasen en helicóptero, aínda que finalmente non puido ser.
O vídeo pode verse desde hai días en Youtube, pero se apostou por proxectalo en pantalla grande tras unha reunión mantida co seu autor e a cronista oficial, Herminia Pernas, co alcalde, Alfredo Llano e o concelleiro de cultura, José Díaz. O interese para os veciños e o feito de que poidan achegarse persoas de idade avanzada que non se manexan ben nas redes levou a toda as partes a acordar a súa proxección pública, que se fixou para o luns.
"É un traballo audiovisual que recompila información desde os anos 40 de como era o Nadal en Burela, con imaxes e declaracións de veciños", conta o rexedor burelense animando a acudir á proxección, na que tamén se recordan outras actividades que levan a cabo na comarca e noutras partes de Galicia, como é o caso da tradición do Apalpador. Un vídeo no que se pode ver a evolución duns festexos, paralelos ao cambio da sociedade.
