O porto de Burela gaña un barco de palangre para os caladoiros de Gran Sol e Francia coa remodelación do Sempre San Prudencio, que cambiou de modalidade pasando da pesqueira do peixe espada para a da pescada europea, que desde agora será a súa especie obxectivo. A empresa armadora, de carácter familiar, adquiriu os dereitos de pesca precisos para realizar esta modificación e variar así a súa área de traballo.
A empresa Talleres Cillero acometeu a reforma, que requiriu a colocación de haladores para palangre e do peche hidráulico para favorecer a utilización desta arte de pesca. Ademais, situaron as necesarias mesas para pasar o peixe e para a súa elaboración. A firma naval debeu así mesmo adaptar os parques de pesca forrando con poliéster os mesmos e procedendo á súa impregnación con pintura alimentaria.
A operación requiriu ademais a retirada dos antigos túneles de conxelación e cámara substituídos por unha cámara específica de conxelado para a almacenaxe e conservación da carnada ou cebo que empregarán durante as faenas de pesca.
O Sempre San Prudencio está xa en varadero dentro do peirao pesqueiro burelense, pendente unicamente de recibir a documentación remitida a Madrid tras a visita cursada polos inspectores da Capitanía Marítima de Burela e a expensas unicamente da colocación dunha sonda de palangre para partir cara a augas comunitarias.
O cambio de modalidade supuxo 60 días de traballo para a firma Talleres Cillero, que deu traballo durante ese período a 40 persoas. O investimento aproximado desta actuación foi de 200.000 euros.
A familia armadora posúe outro buque que tamén opera neses caladoiros e a transformación do San Prudencio permitirá que poida comercializar no seu porto base, posto que ata agora descargaba a espada no porto de Vigo.
