Burela cítase de novo coas urnas para conformar a súa corporación local

Burela volverá este domingo ás urnas, aínda que só será parcialmente, ao ter que repetir os comicios locais nunha das mesas electorais do IES Perdouro, na que teñen dereito a voto un total de 624 persoas. Estas votacións determinarán a composición da corporación burelense —os resultados provisionais son seis edís para o PSOE, catro para o PP e tres para o BNG— e que está pendente duns poucos votos, pero que todos os partidos saben vitais, polo que, aínda sen campaña pola prohibición expresa dos tribunais, pelexan polo apoio dos veciños.

Cada un bota as súas contas, o que leva a prognósticos diversos que van dun extremo a outro, desde que o PSOE logre a maioría absoluta, que está en sete concelleiros, a que perda un, quedando en cinco. Esta última cábala é a que lanza o PP, agrupación que extrapolando os resultados das eleccións xerais do pasado domingo augura "a posible perda dun edil por parte do PSOE, do que poderiamos aproveitarnos nós, co que habería un empate técnico entre ambos a cinco concelleiros, mentres o BNG quedaría con tres", asevera Manuel Rouco, o cabeza de lista do PP.

Unha euforia que aplica transvasando os datos das votacións xerais do pasado domingo "onde fumos o partido máis votado nesa mesa, o que non ocorría dende hai unha década". Os populares obtiveron o domingo nesa mesa, a 1005 O, un total de 134 votos, fronte a 121 do PSOE, 39 de Vox, 38 do BNG e 12 de Ciudadanos, partidos todos que volverán concorrer nos comicios do domingo, dos que se deu de baixa Compromiso por Galicia, tras aceptar a xunta electoral a renuncia individual de todos os compoñentes da lista. "Se se dese un resultado similar habería un cambio de rumbo", augura Rouco.

Son unhas declaracións que non comparten outros grupos, como é o caso do PSOE, onde recoñecen que nas eleccións locais teñen unha porcentaxe de voto "de entre un 12 ou 14 por cento por riba doutras citas, como as xerais ou as autonómicas", polo que non ven desatinado lograr o sétimo edil, do que quedaron a unha vintena de votos, e lograr así a maioría absoluta, o que sería para eles unha carambola perfecta.

"O único que pedimos é que a xente vote en conciencia", recorda o tenente de alcalde, Ramiro Fernández Rey, quen non oculta que lograr a maioría "sería positivo tanto para nós como para o pobo de Burela, porque nos daría unha estabilidade para gobernar, que está claro que axudaría a sacar as cousas para adiante, para o que igual habería máis atrancos se temos que pactar", recoñece.

Os resultados provisionais son seis edís para o PSOE, catro para o PP e tres para o BNG

Un acordo que xa se empezou a fraguar no verán co primeiro inicio das conversas entre socialistas e o Bloque, que foi a terceira forza política o pasado maio e que aspira a conservar as tres actas. Espera poder rendibilizar a subida dun partido "que é a forza de esquerdas que máis sobe na comarca" e que consegue un incremento "dun 47% nas últimas xerais con respecto ao mes de abril". Unha tendencia á alza que espera que a favoreza, aínda que é moi gráfico sinalando que "en Burela todo está aberto, pois todo se xoga nuns cantos votos".

Teña o número de concelleiros que teña, o portavoz do BNG recorda que "o noso traballo vai ser sempre o de mellorar as condicións dous veciños de Burela", asevera.

Unha frase que case calca Carlos Peinó, candidato de Burela Sempre, quen aposta por entrar no goberno "porque Burela está moi mal e queremos facer un traballo limpo e que o concello saia para adiante, que non se atrase, que volva ser o que era, que está moi baixa", manifesta. Algo para o que, recoñece, necesitan o apoio de moita xente, pero "nós confiamos moito na xente de Burela, nesa xente que aínda ten aquel detalle de dicir, pois mira, este partido pode botarnos unha man. E esa xente existe, seino perfectamente", confesa o candidato, cuxa formación foi a que presentou un recurso ao non aparecer os seis votos nulos e que levou ao TSXG a ordenar a repetición dos comicios.