O goberno de Burela arranxará o pavillón Vista Alegre mentres segue traballando para conseguir dotar á localidade dunhas novas instalacións deportivas. Así o confirmou o alcalde, Alfredo Llano, que non dubidou en afirmar que "agora resulta máis sinxelo arranxar ou pavillón actual que facer outro", aínda que subliñou que non deixarán de traballar no novo proxecto. "Non desbotamos a idea de facer o novo pavillón, de feito seguimos traballando niso pero tal e como están as cousas nestes momentos é un plan que se complica un pouco e decidimos arranxar o Vista Alegre", dixo.
Con respecto a estes arranxos, Llano avanzou que este venres está prevista unha reunión cun dos arquitectos que elaborou o proxecto co fin de adaptar o recinto ás esixencias da liga Nacional de Fútbol sala. Non será ata esa reunión cando o Concello coñeza todos os detalles da proposta, pero Llano xa avanza que se contemplan dúas fases para levar a cabo a mellora.
Nun primeiro momento adaptaranse as instalacións ás esixencias da liga, o que implica ampliar espazo na parte de abaixo con bancadas enfronte da bancada principal e espazos para sala de prensa ou vestiarios. "Son unhas obras que non precisan moito tempo de execución, polo que se poderían facer nun verán, algo moi positivo porque o pavillón úsano os alumnos do colexio Vista Alegre e se se teñen que facer durante o curso académico habería que facer unha boa planificación para interromper o mínimo posible ao centro", explicou o rexedor burelense.
O alcalde asegura que nestes momentos "resulta máis sinxelo" reformar as actuais instalacións que apostar polo outro proxecto
Unha segunda fase suporía ampliar as instalacións para dimensionar os servizos que están colocados na parte de arriba como os baños ou o bar. "A idea é aderezar as partes atrasadas, polo que esteticamente será máis bonito", asegura Llano.
Con respecto ao novo pavillón, Llano avanzou que este mesmo mércores manterán unha reunión cos propietarios das leiras que é necesario adquirir xunto ao terreo municipal do Camiño dos Colexios onde está planificada a infraestrutura. A idea é achegar posturas sobre a proposta económica.
A idea do equipo de goberno pasa por contar cunha infraestrutura deportiva que non só sirva para disputar os partidos de fútbol sala dos equipos feminino e masculino senón tamén para dar servizo a todo o deporte basee que hai no municipio. Ademais do pavillón o goberno planificaba acondicionar unha piscina, aínda que a súa construción non coincidiría no tempo senón que se faría máis adiante.
