domingo. 17.11.2019 |
El tiempo
domingo. 17.11.2019
El tiempo

Burela aposta por mirar ao mar

Rúa do Hórreo de Burela, sobre o porto. JOSÉ Mª ÁLVEZ
Rúa do Hórreo de Burela, sobre o porto. JOSÉ Mª ÁLVEZ

O Concello busca perfilar a fachada marítima como unha zona visitable e con vistas ao porto

Un dos obxectivos do equipo de goberno de Burela (agora en funcións) cando chegou ao Concello en 2015 era o de abrir Burela ao mar, do mesmo xeito que ocorre noutras localidades costeiras como Foz ou Viveiro. Nese sentido foi desenvolvendo distintos proxectos, algúns dos cales aínda están en marcha ou só pensados de cara a levalos a cabo no futuro, pero que unidos cumpren coa premisa de facer da fachada marítima burelense unha zona visitable e con vistas ao porto e ao mar, que se converten en atractivos para gozar da localidade.

A última obra anunciada neste sentido foi a de humanización da Rúa do Hórreo, unha zona situada moi preto do porto onde se conserva un hórreo e unha casa moi característica que gardan a esencia da Burela mariñeira. "Fixemos un proxecto de mellora integral para a humanización desa rúa para facer unha zona visitable cun miradoiro que permita apreciar o porto", explicou o alcalde, Alfredo Chairo, que detallou que levará a cabo a separación de pluviais e residuais, unha nova canalización de auga, a renovación do firme con pedra de granito silvestre e a instalación de varandas. A obra conta cun orzamento de 120.000 euros, dos cales a Xunta achegará o 80% e o resto o Concello. Os traballos efectuaranse entre este ano e o próximo.

Outra das zonas nas que se coidou a apertura ao mar foi o tramo de paseo cara ao Cantiño que transcorre paralelo ao viario de acceso ao porto. O paseo en si mesmo xa ten vistas sobre o Cantábrico, pero tamén se acondicionou un miradoiro sobre a zona na que se acharon os restos dun hipocausto romano.

Mirando cara ao outro lado, o Concello leva anos querendo mellorar a contorna do edificio de Capitanía Marítima, edificado fronte á praia de Penoural. A idea é remodelar aquel espazo para crear unha praza pública cun parque infantil que favoreza a afluencia de xente nesa zona. Desta forma, o Concello quere mobilizar á iniciativa privada para crear nas naves que agora non ten uso negocios vinculados á actividade marítima de hostalería ou de venda de artesanía ou conservas. O alcalde defende que se trata dunha zona moi transitada, de acceso ás praias, e que é o sitio idóneo para crear outro atractivo para a localidade.

Chairo xa abordou este tema con Portos de Galicia nalgunha ocasión e incluso chegaron a facerse traballos de limpeza na zona hai algúns anos, pero polo momento non hai unha data marcada para pór a andar os traballos.

Tamén neste sentido, o Concello puxo en marcha un certame de pintura mural que se celebra en agosto e que está a converter o muro do porto nun museo ao aire libre.

Burela aposta por mirar ao mar
Comentarios