Burela acollerá os próximos 12 e 13 de decembro o primeiro congreso nacional de artes de pesca, que presentou este martes a Fundación Expomar para reivindicar e difundir o uso e coñecemento das artes de pesca tradicionais.
Así o destacou o presidente da fundación e alcalde da localidade, Alfredo Llano, quen sinalou que o obxectivo é pór en valor este tipo de pesca "respectuosa co medio ambiente e sostible", no que se inclúe a pesca con anzol e a cacea, tamén coñecida como 'curricán'.
Llano fixo fincapé en que a flota de Burela, tanto a que extrae pescada no Gran Sol como a que se dedica ao bonito do norte, segue usando estas artes.
O presidente da fundación, que organiza bianualmente a Feira Náutico Pesqueira Expomar, puxo de manifesto o valor que, segundo sinalou, teñen as artes tradicionais para salvagardar o medio mariño.
Neste sentido, destacou que fronte ás "ameazas que recaen actualmente sobre o futuro da Terra" as artes de pesca tradicionais "son respectuosas e non esquilman os bancos de pesca".
O rexedor resaltou, ao mesmo tempo, a necesidade de "conservar" este tipo de artes "que forman parte do patrimonio cultural" da pesca e de difundilas "para que non se perdan". Neste sentido, indicou que o congreso servirá para "pór en común o coñecemento de distintas flotas artesanais".
PARTICIPANTES. Tamén incidiu en que a cita servirá para atraer á localidade a un bo número de expertos que debaterán sobre este asunto. Na sesión inaugural estarán a conselleira do Mar, Rosa Quintana, e o presidente da Deputación de Lugo, José Tomé. Tamén asistirá como moderadora a directora xeral de Pesca, Mercedes Rodríguez.
O congreso abordará na primeira xornada, na tarde do xoves 12, da man do patrón maior de Burela e presidente da Federación Nacional de Pesca, Basilio Otero, a necesidade da posta en valor das artes de pesca e a importancia das novas xeracións.
Tamén o xoves, representantes do sector pesqueiro de Cataluña, Baleares e Andalucía analizarán as distintas artes de pesca e especies diferenciais desas áreas xeográficas.
Para rematar, todos os participantes da xornada falarán nunha mesa redonda sobre boas prácticas para unha pesca sostible.
O venres seguirá o debate con cuestións como a xestión de portos en Galicia, a cargo da presidenta de Portos de Galicia, Susana Leguas Gil.
Tamén se revisará a capacidade de crecemento do sector pesqueiro, da man da profesora do departamento de economía aplicada da Universidade de Santiago de Compostela (USC) María Carmen García Negro.
A potencialidade turística do mar, xunto co rural, será abordada polo xerente do Grupo de Acción Rural 'Terras de Miranda', Vidal Martínez.
Despois será a quenda da pesca recreativa e o rexistro de capturas, tema do que disertará o presidente da federación galega de pesca marítima responsable e náutica de recreo, José Antonio Beiro Diz. Pechará os relatorios o director de Abanca Mar, Javier Fraga Díaz, que mostrará as posibilidades de financiamento do sector pesqueiro.
O broche final será unha mesa redonda sobre innovación no sector pesqueiro, na que participarán os relatores deste día, aos que se suma a directora de exportación e importación de Pescados Rubén, Concepción Blanco.
Para a celebración do simposio, a Fundación Expomar conta co apoio económico do Grupo de Acción Local da Pesca da Mariña-Ortegal.
