Os numerosos afeccionados ao fútbol sala de Burela, en particular, e de toda A Mariña, en xeral, están de parabéns, xa que por vez primeira a selección española feminina de fútbol sala disputará un encontro amigable na comarca.
Será o día 11 de decembro, mércores, cando o pavillón Vista Alegre de Burela acolla o enfrontamento entre España e Xapón, o mesmo duelo que terá lugar o día anterior no pavillón de A Raña, en Marín.
A posibilidade de que haxa numerosa presenza de xogadoras do Pescados Rubén na cita crece a medida que se achega a data, xa que catro delas están convocadas para acudir á concentración para os amigables en Eslovenia entre o 3 e o 7 de novembro.
Ademais de Peque, fixa na selección, e de Jenny Lores, que xa debutou nos últimos encontros, tamén están citadas a porteira Ana Romero e Ale de Paz, que se estrearán coa selección.